ৰণলৈ সাজু বিজেপি! বৃহস্পতিবাৰে বিজেপিৰ ‘অসম জন সম্বোধন’ শীৰ্ষক ভাৰ্চুৱেল ৰেলী, অংশ ল’ব ৰাষ্ট্ৰীয় সভাপতিয়ে

অব্যাহত আছে কোৰোণাৰ মহাতংক ৷ তাৰ মাজতে ৰাজনৈতিক দল সমূহে অব্যাহত ৰাখিছে ৰাজনৈতিক কুচকাৱাজ ৷ আগন্তুক অসম বিধানসভা নিৰ্বাচনত বিজেপিৰ ‘হানড্ৰেড প্লাছ’ৰ লক্ষ্যৰে কোৰোণাৰ আতংকৰ মাজতো ৰণলৈ সাজু হৈছে গেৰুৱা দল বিজেপি ৷

বৃহস্পতিবাৰে বিজেপিৰ ভাৰ্চুৱেল ৰেলীত অংশ ল'ব সভাপতি জে পি নাড্ডাই ৷ ইতিমধ্যে কোৰোণাক লৈ সজাগতা সৃষ্টিৰ উদ্দেশ্যে মঙলবাৰৰ পৰা বিজেপিয়ে আৰম্ভ কৰিছে জনসম্পৰ্ক অভিযান ৷ এই জনসম্পৰ্ক অভিযানৰ যোগেদি ৫০লাখ পৰিয়ালৰ কাষ চাপিব বিজেপি ৷ জনসম্পৰ্ক অভিযানৰ সময়ছোৱাত প্ৰধানমন্ত্ৰী নৰেন্দ্ৰ মোদীয়ে লিখা সজাগতামূলক পত্ৰ আৰু মুখ্যমন্ত্ৰী সৰ্বানন্দ সোণোৱালে লিখা পত্ৰ বিতৰণ কৰিব দলটোৰ কাৰ্যকৰ্তাই ৷

"কেন্দ্ৰীয় নেতৃত্বৰে হোৱা আলোচনাৰ পিছত আমি পঞ্চাছ লাখ পৰিয়ালৰ কাষ চাপিব বিচাৰিছো ৷ স্বাস্থ্য বিভাগৰ গাইডলাইন অনুযায়ী আমি ইতিমধ্যে এই অভিযান আৰম্ভ কৰিছো ৷ নিৰ্ধাৰিত সময়ৰ পূৰ্বে আমি এই অভিযান সামৰণি মাৰিব পাৰিম ৷"—ৰণজিৎ দাস,সভাপতি।

এফালে জনসম্পৰ্ক অভিযান আৰু আনফালে দলীয় কাৰ্যকৰ্তাক আকৰ্ষিত কৰিবলৈ বিজেপিয়ে বৃহস্পতিবাৰে আয়োজন কৰিছে ভাৰ্চুৱেল ৰেলীৰ ৷ দিল্লীৰ পৰাই ভাৰ্চুৱেল ৰেলীত অংশ ল'ব জে পি নাড্ডাই ৷ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত আয়োজন কৰা ভাৰ্চুৱেল ৰেলীত উপস্থিত থাকিব মুখ্যমন্ত্ৰী সৰ্বানন্দ সোণোৱাল, নেডাৰ আহ্বায়ক ড৹ হিমন্ত বিশ্ব শৰ্মাৰ লগতে আন মন্ত্ৰী বিধায়ক সাংসদ ৷ দিনৰ ১২বজাত বিজেপিৰ ফেচবুক পে'জ আৰু ইউটিউব ছাইটত পোনপটীয়া সম্প্ৰচাৰেৰে ৰাজ্যৰ সকলো বিজেপি কাৰ্যকৰ্তাই অংশগ্ৰহণ কৰিব ৰেলীটোত ৷ ‘অসম জন সম্বোধন’ শীৰ্ষক ভাৰ্চুৱেল ৰেলীত নৰেন্দ্ৰ মোদী নেতৃত্বাধীন ভাৰত চৰকাৰৰ দ্বিতীয় কাৰ্যকালৰ প্ৰথম বৰ্ষপূৰ্তি আৰু সৰ্বানন্দ সোণোৱাল নেতৃত্বাধীন অসম চৰকাৰৰ চতুৰ্থ বৰ্ষপূৰ্তিয়ে স্থান লাভ কৰিব বুলি জানিবলৈ দিছে ৰাজ্যিক বিজেপিৰ সভাপতি ৰণজিৎ কুমাৰ দাসে ৷