ৰঙিয়াৰ মৰাণজানাত ভি আই পি ছাগলী চোৰ আটক, ধৰা পৰা পিছত চোৰৰ লাগিল লাজ

ৰঙিয়াৰ মৰাণজানাত ভি ভি আই পি ছাগলী চোৰ আটক। ভি ভি আই পি চোৰে কেতিয়াবা যদি স্কৰপিঅ’ত, কেতিয়াবা আকৌ দামী বাইক লৈ ছাগলী চুৰি কৰিবলৈ আহে। শনিবাৰে নিশা ছাগলী চুৰি কৰি বাইকেৰে লৈ গৈ থকা অৱস্থাত ৰাইজে খেদি খেদি কৰায়ত্ত কৰিলে দুই চোৰক। ধৃত চোৰ দুটা হৈছে কামৰূপৰ জিলাৰ কমলপুৰ থানাৰ অন্তৰ্গত আঠাৰাৰ হিৰকজ্যোতি চৌধুৰী আৰু মধুকুছিৰ যতীন ৰাজবংশী। কলমণিৰ পৰা ছাগলী চুৰি কৰি ৰঙিয়াৰ ছাগলী ব্যৱসায়ীৰ ওচৰত বিক্ৰী কৰিবলৈ আহিছিল ধৃত দুই চোৰে। কিন্তু দিন বেয়া আছিল ছাগলী চোৰ দুটাৰ। ৰাইজে হাতে লোতে কৰায়ত্ত কৰিলে দুয়োকে।

ধৰা পৰাৰ পিছতো চতুৰ চোৰে ঘনে ঘনে সলনি কৰি নিজৰ পৰিচয়। চোৰ দুটাৰ কৰ্মকাণ্ড দেখি একাংশই দিলে উত্তম–মধ্যম। খবৰ দিয়া হল ৰঙিয়া আৰক্ষীক। আৰক্ষীৰ উপস্থিত হোৱাত প্ৰকৃত পৰিচয় ওলাল চোৰ দুটাৰ। দীৰ্ঘদিনে বিভিন্ন চুৰিকাৰ্যত জড়িত এই চোৰ দুটা। বিগত সময়ছোৱাত আৰক্ষীৰ মূৰৰ কামোৰণি আছিল চোৰ দুটা। আৰক্ষীয়ে ইতিমধ্যে চোৰ দুটাক আটক কৰি থানালৈ লৈ আহে। দুয়োকে ৰঙিয়া থানাত আৰক্ষীয়ে জেৰা অব্যাহত ৰাখিছে।