Akhil Gogoi: অখিল গগৈ আচলতে বিৰোধী পক্ষৰ নে শাসকীয় BJP পক্ষৰ?

আচলতে ৰাইজৰ দলৰ সভাপতি তথা শিৱসাগৰ সমষ্টিৰ বিধায়ক অখিল গগৈ কাৰ? কাৰ পক্ষত আছে অখিল গগৈ? অখিল গগৈয়ে শাসকীয় BJPক সততে কঠোৰ সমালোচনা কৰা দেখা যায় ৷ বিৰোধীৰ ভূমিকা অসম বিধানসভাৰ মজিয়াতো লোৱা দেখা যায়। কিন্তু সদনৰ বাহিৰে-ভিতৰে অখিল গগৈয়ে বিৰোধী AIUDFক সাম্প্ৰদায়িক দল বুলি সমালোচনাও কৰা দেখা যায়।

ইয়াৰ মাজতে এতিয়া কংগ্ৰেছৰে মিত্ৰতাৰ বাবে খৰখেদা কৰা দেখা গৈছে অখিল গগৈয়ে ৷ একাধিকবাৰ দুয়োটা দলৰ মাজত আলোচনাও হৈছে ৷

শিৱসাগৰৰ এখন হোটেলত প্ৰদেশ কংগ্ৰেছৰ সভাপতি ভূপেন বৰাৰে দুদিন পূৰ্বে  ৰাইজৰ দলৰ সভাপতি অখিল গগৈৰ এক বৈঠকো অনুষ্ঠিত হৈ যায় ৷ সেই বৈঠক সন্দৰ্ভত বুধবাৰে প্ৰতিক্ৰিয়া প্ৰকাশ কৰিছে শাসকীয় বিজেপি আৰু বিৰোধী AIUDFৰ বিধায়কে ৷ বিজেপি বিধায়ক মৃণাল শইকীয়াই ক'লে- “অখিল গগৈয়ে কেতিয়াবা বিৰোধীৰ লগত বহে আৰু কেতিয়াবা আমাৰ লগত বহে ৷ তেওঁ ক'ত বহে তেওঁ নিজেই নাজানে। ”

ইপিনে কেইদিনমান আগলৈ সাপ-নেওলৰ দৰে কথা কটা-কটিত লাগি থকা AIUDFক বুধবাৰে কিছু নৰম হোৱা দেখা গ'ল ৷ AIUDFৰ  জ্যেষ্ঠ বিধায়ক আমিনুল ইছলামে ক'লে- “অখিল গগৈৰ লগত আমাৰ মিল আছে ৷ মহাজোঁটত AIUDF আছে, AIUDFৰ প্ৰয়োজনীয়তা কোনেও অস্বীকাৰ কৰিব নোৱাৰে৷ AIUDF নহ'লে কংগ্ৰেছে ২৫খন আসনো নাপালেহেঁতেন বিগত নিৰ্বাচনত ৷ অখিল গগৈৰ চৰ্ত কংগ্ৰেছে কি কৰে সেয়া কংগ্ৰেছৰ কথা, কিন্তু অখিলৰ বিজেপিবিৰোধী স্থিতি আমাৰ সৈতে মিল আছে ৷ কিন্তু মহাজোঁটত AIUDF এলাগী হোৱা নাই এতিয়াও ৷”