উত্তৰ-পূবত প্ৰৱেশ কৰিলে দক্ষিণ–পশ্চিম মৌচুমী, আগন্তুক দিনত ৰাজ্যত অব্যাহত থাকিব বৰষুণ

উত্তৰ-পূবত প্ৰৱেশ কৰিলে দক্ষিণ পশ্চিম মৌচুমী। আগন্তুক দিনত অব্যাহত থাকিব বৰষুণ। ৰাজ্যত তথা উত্তৰ-পূবত আজিৰে পৰা প্ৰৱেশ ঘটিল দক্ষিণ পশ্চিম মৌচুমীৰ। এই মৌচুমীৰ ফলতে ৰাজ্যত তথা উত্তৰ-পূবৰ কিছু ঠাইত আগন্তুক দিনত অব্যাহত থাকিব প্ৰবল বৰষুণ।

আৰৱ সাগৰৰ মধ্যম ভাগৰ পৰা ভাৰত অভিমুখে অহা দক্ষিণ পশ্চিম মৌচুমীয়ে আজি উত্তৰ-পূবত প্ৰৱেশ কৰে বুলি তথ্য প্ৰকাশ কৰে বৰঝাৰস্থিত আঞ্চলিক বতৰ বিজ্ঞান কেন্দ্ৰই। বিগত দুটা বছৰত এই মৌচুমী ১০ জুনত প্ৰৱেশ কৰিছিল যদিও এইবাৰ ৬ জুন তাৰিখেই প্ৰৱেশ ঘটে । এই মৌচুমীৰ ফলত আজিৰে পৰা উত্তৰ-পূবৰ বহু ঠাইত প্ৰায়ে হৈ থাকিব বৰষুণ।

আজিৰে পৰা আগন্তুক ৩দিনলৈ অসম, মেঘালয়, অৰুণাচল, মিজোৰাম, নাগালেণ্ড, মণিপুৰৰ কিছু ঠাইত বৰষুণৰ সম্ভাৱনা আছে। আজি অসমৰ লগতে উত্তৰ-পূবৰ কিছু কিছু ঠাইত পাতলীয়া বৰষুণৰ হোৱাৰ পিছত তৃতীয় দিনলৈ এই বৰষুণৰ মাত্ৰা অধিক হ'ব বুলি মন্তব্য কৰে বৰঝাৰ আঞ্চলিক বতৰ বিজ্ঞান কেন্দ্ৰৰ মুখ্য বতৰ বিজ্ঞানী সঞ্জয় অ'নিল শ্বৱে।