সোণতলীত ভয়ংকৰ পথ দুৰ্ঘটনা ! থিতাতে নিহত এজন বৃদ্ধ; গুৰুতৰভাৱে আহত দুজন

দক্ষিণ কামৰূপৰ সোণতলী আৰক্ষী চকীৰ অন্তৰ্গত শেলেসুতিত ভয়ংকৰ পথ দুৰ্ঘটনা সংঘটিত হৈছে। এখন বাইক আৰু চাইকেলৰ মুখামুখি সংঘৰ্ষৰ ফলত এজন ৬০ বছৰৰ উৰ্ধৰ এজন চাইকেল আৰোহী থিতাতে নিহত হোৱাৰ লগতে আন দুজন লোক গুৰুতৰ ভাৱে আঘাত প্ৰাপ্ত হয় ৷ স্থানীয় ৰাইজে অতি তৎপৰতাৰে তিনিওকে ততাতৈয়াকৈ সোণতলী প্ৰাথমিক স্বাস্থ্য কেন্দ্ৰত ভৰ্তি কৰায় যদিও পথালীপাৰাৰ আৰান আলী নামৰ বৃদ্ধলোকজনৰ ইতিমধ্যে মৃত্যু হোৱা বুলি চিকিৎসকে ঘোষণা কৰে। আনহাতে, আঘাতপ্ৰাপ্ত উত্তৰ ৰাঙাপানীৰ জাহাংগীৰ আলম আৰু আমিনুল আলীক প্ৰাথমিক চিকিৎসা প্ৰদান কৰি সংকটজনক অৱস্থাত গুৱাহাটী চিকিৎসা মহাবিদ্যালয়লৈ প্ৰেৰণ কৰা হয়।

উল্লেখ্য যে, সোণতলী অঞ্চলৰ একাংশ উদণ্ড যুৱকে নিচা জাতীয় দ্ৰব্য সেৱন কৰি অতি তীব্ৰ গতিত নিয়ন্ত্ৰনহীন ভাৱে বাইক চলোৱাৰ বাবে সঘনাই পথ দুৰ্ঘটনা সংঘটিত হৈ আহিছে বুলি ৰাইজে অভিযোগ উত্থাপন কৰিছে ৷ এই সম্পৰ্কে সোণতলী আৰক্ষীক একাংশ সচেতন লোকে অভিযোগ কৰি আহিছে যদিও সোণতলী আৰক্ষীয়ে কোনো গুৰুত্ব প্ৰদান নকৰা বুলি ৰাইজে জানিবলৈ দিয়ে ৷ অতি শীঘ্ৰে এনে উদণ্ড বাইক চালকৰ বিৰুদ্ধে কঠোৰ ব্যৱস্থা গ্ৰহণৰ বাবে আৰক্ষী প্ৰশাসনৰ ওচৰত ৰাইজে দাবী কৰিছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।