গগৈৰ ৰাজনৈতিক জীৱনৰ উত্থান-পতনৰ সাক্ষী নগাঁও ৰাজীৱ ভৱন, এসময়ত নগাঁও ৰাজীৱ ভৱনৰ পৰাই কংগ্ৰেছক শক্তিশালী কৰিছিল গগৈয়ে?

নগাঁও ৰাজীৱ ভৱনত বৰ্তমান মৰিশালীৰ নিস্তব্ধতা। কাৰণ প্ৰাক্তন মুখ্যমন্ত্ৰী তৰুণ গগৈৰ মৃত্যুৰ লগে লগে যেন গৰাকীহীন হৈ পৰিল নগাঁও ৰাজীৱ ভৱন। এসময়ত দেৱকান্ত বৰুৱাৰ সৈতে লগ লাগি নগাঁও ৰাজীৱ ভৱনতে কংগ্ৰেছৰ সাংগঠনিক ভেটি শক্তিশালী কৰিছিল সদ্যপ্ৰয়াত প্ৰাক্তন মুখ্যমন্ত্ৰীগৰাকীয়ে। অসম আন্দোলনৰ পৰৱৰ্তী পৰ্যায়ত আৰু দেৱকান্ত বৰুৱাৰ বিয়োগৰ পিছত নগাঁও জিলা কংগ্ৰেছক পুনৰ শক্তিশালী কৰাৰ দায়িত্ব গ্ৰহণ কৰিছিল তৰুণ গগৈয়ে।

একাধিকবাৰ কলিয়াবৰৰ সাংসদ হিচাপে নিৰ্বাচিত হোৱা তৰুণ গগৈয়ে সৰ্বদা কংগ্ৰেছৰ তৃণমূল কৰ্মীৰ পৰা জিলা পৰ্যায়ৰ নেতৃত্বৰ সৈতে গঢ়ি তুলিছিল মধুৰ সম্পৰ্ক। ২০০১ চনত প্ৰথমবাৰৰ বাবে মুখ্যমন্ত্ৰীৰ পদত অধিষ্ঠিত হোৱাৰ আগলৈকে কলিয়াবৰৰ সাংসদ হিচাপে কাৰ্যনিৰ্বাহ কৰা তৰুণ গগৈৰ বিৰুদ্ধে কাহানিও দলৰ মজিয়াত কোনোধৰণৰ লবীকেন্দ্ৰিক ৰাজনীতিৰ সৃষ্টি হোৱা নাছিল।

বৰ্তমান নগাঁও জিলা কংগ্ৰেছৰ সভাপতিৰূপে কাৰ্যনিৰ্বাহ কৰা তপন শৰ্মাই আজি News18 অসমক জনোৱা অনুসৰি, তেওঁ অসম আন্দোলনৰ পৰৱৰ্তী পৰ্যায় আৰু আলফাৰ কংগ্ৰেছবিৰোধী স্থিতিৰ সময়ত দলীয় কৰ্মীক কৰ্মত নিয়োজিত হ'বলৈ সাহস যোগাইছিল।

মুখ্যমন্ত্ৰী হিচাপে অধিষ্ঠিত হোৱাৰ পিছতো প্ৰয়াত তৰুণ গগৈৰ ভাতৃ দ্বীপ গগৈ আৰু তেওঁৰ পুত্ৰ গৌৰৱ গগৈ কলিয়াবৰৰ সাংসদৰূপে নিৰ্বাচিত হৈছিল। সেয়ে মৃত্যুৰ সময়লৈকে নগাঁও ৰাজীৱ ভৱনৰে আত্মিক সম্পৰ্ক আছিল তৰুণ গগৈৰ।