Price Rise : যোগান মন্ত্ৰীয়ে দাম কমাব নোৱাৰে মিঠাতেলৰ, দিল্লীৰ ওপৰতে নিৰ্ভৰশীল মিঠাতেলৰ মূল্য ৷ মন্ত্ৰী ৰণজিত কুমাৰ দাসৰ মন্তব্য।

মিঠাতেলৰ উৰ্ধমুখী মূল্যই কন্দুৱাইছে ৰান্ধনীক ৷ কন্দুৱাইছে গৃহস্থকো ৷ মিঠাতেলৰ এনে অভাৱনীয় মূল্যবৃদ্ধিয়ে জুৰুলা কৰা ৰাইজৰ দুখৰ সমভাগী যোগান মন্ত্ৰী ৰণজিত কুমাৰ দাস ৷  পিছে তেওঁ কমাব নোৱাৰে মিঠাতেলৰ দাম ৷ তাৰ বাবে দিল্লীৰ পলিচীৰ ওপৰতহে নিৰ্ভৰশীল যোগান মন্ত্ৰী ৷

এতিয়া বিদেশৰ পৰা মিঠাতেলৰ আমদানি অথবা সৰিয়হ উৎপাদনৰ সময়লৈ অপেক্ষা কৰাৰ বাহিৰে অন্য কোনো পথ নাই যোগান মন্ত্ৰীৰ হাতত ৷ তাৰবাবে যদি মিঠাতেলৰ মূল্য ২০০ টকাও চেৰাই যায় তথাপি অসহায় যোগান মন্ত্ৰী ৷

বৰপেটাৰ অভিভাৱক মন্ত্ৰী হিচাপে প্ৰথমখন পৰ্যালোচনা বৈঠকত অংশগ্ৰহণ কৰি ৰাজ্যৰ যোগান আৰু পঞ্চায়ত বিভাগৰ মন্ত্ৰী ৰণজিত কুমাৰ দাসে এই মন্তব্য কৰে ৷

বৰপেটা জিলা উপায়ুক্ত কাৰ্যালয়ৰ সভাকক্ষত জিলাখনৰ বান আৰু খহনীয়া সমস্যাৰ লগতে লোক নিৰ্মাণ বিভাগৰ কাম-কাজৰো পৰ্যালোচনা কৰে মন্ত্ৰীগৰাকীয়ে ৷ লোক নিৰ্মাণ বিভাগৰ অধীনত নিৰ্মাণ কাৰ্য চলি থকা গৃহসমুহৰ কামৰ বুজ লৈ কামত গাফিলতি কৰা ঠিকাদাৰসকলক কামৰ পৰা আতৰাই পঠোৱাৰ ব্যৱস্থা ল'বলৈকো নিৰ্দেশ দিয়ে  ৷

জিলাখনত কৰ্তব্যৰত বিষয়াসকলক কোনো ধৰণৰ ছিণ্ডিকেটৰ সৈতে জড়িত নহ'বলৈকো কঠোৰ সকিয়নি প্ৰদান কৰে মন্ত্ৰী ৰণজিত কুমাৰ দাসে ৷