ৰঙিয়াত বৰদৈচিলাৰ তাণ্ডৱ, বন্ধ ৰাজপথ, ব্যাহত বিজুলী যোগান

দেওবাৰে সন্ধিয়া অহা এজাক প্ৰবল ধুমুহাত বিস্তৰ ক্ষতিসাধন হয় ৰঙিয়াৰ বিভিন্ন অঞ্চলত । বৰদৈচিলাই সংহাৰী ৰূপ ধাৰণ কৰাত আন্তঃৰাষ্ট্ৰীয় ঘাইপথৰ ওপৰতে উভালি পৰে প্ৰকাণ্ড গছ । বহু সময় ধৰি বন্ধ হৈ পৰে ভাৰত-ভূটান আন্তঃৰাষ্ট্ৰীয় ঘাইপথটো । শ শ যান বাহন আবদ্ধ হৈ পৰে ৰঙিয়াৰ তুলসীবাৰী অঞ্চলত ।

দেওবাৰে সন্ধিয়া ৰঙিয়া নগৰ, উদিয়ানা, তুলসীবাৰীৰ ওপৰৰে এজাক প্ৰৱল বা-মাৰলি পাৰ হৈ যায় । এই প্ৰচণ্ড ধুমুহা বৰষুণত ৰঙিয়াৰ বিভিন্ন অঞ্চলত বিস্তৰ ক্ষতিসাধন হয় । কেইবাটাও ঘৰ ভাঙি পৰে আৰু ঘৰৰ টিন পাত উৰুৱাই লৈ যায় । প্ৰকাণ্ড গছবোৰ  উভালি পৰাত ছিগি পৰে বৈদ্যুতিক তাঁৰ, যাৰ ফলত বিজুলী সংযোগ সম্পূৰ্ণ বিচ্ছিন্ন হৈ পৰে ।