স্বস্তিৰ নিশ্বাস ৰাজ্যিক বিজেপিৰ সভাপতি ৰণজিৎ দাসৰ, কোভিড–১৯ টেষ্টৰ ফলাফল আহিল নিগেটিভ

ৰাজ্যিক বিজেপিৰ সভাপতি ৰণজিৎ কুমাৰ দাসৰ মনৰ পৰা আঁতৰিল শংকা৷ প্ৰায় পোন্ধৰ দিন পূৰ্বে ৰণজিৎ দাসৰ দেহৰক্ষী এজনৰ দেহত ধৰা পৰিছিল কোভিড–১৯৷ দেহৰক্ষী গৰাকীৰ দেহত কোভিড–১৯ৰ উপস্থিতি ধৰা পৰাৰ পিছতে ৰণজিৎ দাসে সপৰিয়ালে কৰাইছিল নমুনা পৰীক্ষা৷ সোমবাৰে আহিল ৰণজিৎ দাসৰ লগতে পৰিয়ালৰ কোভিড টেষ্টৰ ফলাফল৷

"মোৰ দেহৰক্ষী এগৰাকী পোন্ধৰ দিন মানৰ আগত কোভিড পজিটিভ হৈছিল৷ তেতিয়াৰ পৰা তেওঁ মোৰ লগত নাই৷ তথাপি মই নিজাকৈ টেষ্ট কৰোৱাৰ আগ্ৰহ প্ৰকাশ কৰি নমুনা দিলো৷ আজি মোৰ নিগেটিভ ৰিপ’ৰ্ট আহিল৷"— ক’লে ৰণজিত্‍ কুমাৰ দাসে।

নিজৰ লগতে পৰিয়ালৰো ৰিপ’ৰ্ট নিগেটিভ অহাৰ পিছতে ৰণজিৎ দাসৰ ৰাইজলৈ আহ্বান, চৰকাৰৰ লগত সহযোগিতা কৰক ৰাইজে৷ মানি চলক স্বাস্থ্য বিধি৷ সকলোৱে পৰীক্ষা কৰাওক নমুনা৷ চৰকাৰে তাৰ বাবে সকলো সুবিধা কৰি দিছে৷

এফালে কোৰোণা সংকট আৰু আনফালে বহুকেইখন জিলাত বানৰ সংহাৰী ৰূপ৷ এই সংকটকালত সকলোকে ধৈৰ্য ধৰিবলৈ আহ্বান জনাই বিজেপিৰ ৰাজ্যিক সভাপতি ৰণজিৎ দাসে লগতে ক'লে " বিজেপিয়ে বানপীড়িত অঞ্চলত সাময়িকভাৱে বন্ধ কৰিছে জনসম্পৰ্ক অভিযান৷"