অচিৰেই ঘোষিত হ'ব বিজেপিৰ নতুন ৰাজ্যিক কমিটী, কোন কোন থাকিব টীম ৰণজিত্‍ দাসত?

শীঘ্ৰেই ঘোষিত হ'ব বিজেপিৰ ৰাজ্যিক কমিটী ৷ টীম ৰণজিৎ দাসত কোন কোন? বিৰামহীন কৰ্মসূচীৰে ২০২১ত বিজেপি ‘হানড্ৰেড প্লাছ’ৰ লক্ষ্যৰে সভাপতি হিচাপে দ্বিতীয় ইনিংছ আৰম্ভ কৰা ৰণজিৎ কুমাৰ দাসৰ টীমত কোন কোন থাকিব তাক লৈ দীৰ্ঘদিন ধৰি চৰ্চা চলি আহিছে ৷

অচিৰেই ঘোষিত হ'ব ৰাজ্যিক বিজেপিৰ নতুন কমিটীখন ৷ বিশেষকৈ সাধাৰণ সম্পাদক কোন কোন হ'ব তাক লৈ চৰ্চা অধিক ৷ তিনিজন সাধাৰণ সম্পাদকৰ ভিতৰত এজন নলবাৰীৰ প্ৰাক্তন বিধায়ক তথা পৰ্যটন নিগমৰ অধ্যক্ষ জয়ন্ত মল্ল বৰুৱা হোৱাৰ বিপৰীতে দ্বিতীয়টো পদবীত যুৱ নেতা তৰংগ গগৈৰ নাম তালিকাত আছে বুলি বিজেপিৰ এক সুত্ৰৰ পৰা জানিব পৰা গৈছে ৷

তৃতীয়টো সম্পাদকৰ পদত কোন? তৃতীয়টো ৰাজ্যিক সম্পাদকৰ পদক লৈ বিবুদ্ধিত ৰাজ্যিক নেতৃত্ব ৷ তৃতীয়টো পদৰ বাবে দিল্লীলৈ গৈছে দুটাকৈ নাম ৷ নাম গৈছে জয়ন্ত কুমাৰ দাস আৰু দীপ্লুৰঞ্জন শৰ্মাৰ ৷ এই দুই যুৱনেতাৰ ভিতৰত যিকোনো এজন থাকিব টীম ৰণজিৎ দাসত ৷ আনহাতে, ৰণজিৎ দাসৰ দৰে যুৱ মৰ্চাৰ সভাপতি অনুপ বৰ্মনেই দ্বিতীয় ইনিংছ আগুৱাই নিয়াৰে সম্ভাৱনা ৷