ভয়ানক ৰূপত বৃদ্ধি পাব ধৰিছে প্ৰৱঞ্চনা, ATM সুৰক্ষাৰ স্বাৰ্থত মহানগৰ আৰক্ষীৰ বিশেষ ব্যৱস্থা

ৰাজ্যৰ ভিন্ন প্ৰান্তৰ সমান্তৰালকৈ গুৱাহাটীত শেহতীয়াকৈ ভয়ানক ৰূপত বৃদ্ধি পাব ধৰিছে ATM প্ৰৱঞ্চনাৰ ঘটনা ৷ ATMৰ পৰা টকা উলিয়াবলৈ অহা লোকক বিভিন্ন প্ৰকাৰে নিজৰ জালত পেলাই ATMৰ জৰিয়তে সাঁচতীয়া ধন লৈ উধাও হয় প্ৰৱঞ্চকৰ দলটো ৷

বিশেষকৈ গুৱাহাটীত শেহতীয়াকৈ এই ঘটনা বৃদ্ধি পাব ধৰাত এই প্ৰৱঞ্চকৰ বিৰুদ্ধে এইবাৰ সষ্টম হৈ উঠিছে মহানগৰ আৰক্ষী (City Police) ৷ এনে প্ৰৱঞ্চকৰ কবলৰ পৰা সাৰিবলৈ ল'বলগীয়া সাৱধানতা সন্দৰ্ভত ৰাইজলৈ শনিবাৰে মহানগৰ আৰক্ষীয়ে মুকলি কৰিলে কেতবোৰ পোষ্টাৰ ৷

অকল পোষ্টাৰে নহয়, ইতিমধ্য বেংক কৰ্তৃপক্ষৰে মিলি ATMৰ নিৰাপত্তা দিশটো অধিক কটকটীয়া কৰাৰ বাবেও আলোচনাত মিলিত হৈছে মহানগৰ আৰক্ষী ৷ কাৰণ বহু ATM চোৰ গুৱাহাটীত প্ৰৱেশ কৰাৰ তথ্য লাভ কৰিছে মহানগৰ আৰক্ষীয়ে ৷ অৱশ্য এইক্ষেত্ৰত ৰাইজৰো সহযোগিতা বিচাৰিলে মহানগৰ আৰক্ষী আয়ুক্ত হৰমিৎ সিঙে ৷ পিছে শেহতীয়াকৈ মহানগৰীত বৃদ্ধি পোৱা এই প্ৰবঞ্চনা ৰোধ কৰাত আৰক্ষী কিমান সফল হয়, সেয়া সময়েহে ক'ব ৷