Assam Assembly 2021: প্ৰথমবাৰৰ বাবে ভোটাধিকাৰ সাব্যস্ত কৰিলে হিমন্ত তনয় নন্দিল বিশ্ব শৰ্মাই। ক'লে- ৰাজনীতি মানে জনতাক সবল কৰাৰ প্ৰক্ৰিয়া।

প্ৰথমবাৰৰ বাবে ভোটাধিকাৰ সাব্যস্ত কৰিলে বিত্ত, স্বাস্থ্য তথা শিক্ষা মন্ত্ৰী হিমন্ত বিশ্ব শৰ্মাৰ পুত্ৰ নন্দিল বিশ্ব শৰ্মাই। পিতৃ হিমন্ত বিশ্ব আৰু মাতৃ ৰিণিকী ভূঞা শৰ্মাৰ সৈতে আমিনগাঁৱৰ ভোটকেন্দ্ৰলৈ গৈ আজি গণতন্ত্ৰৰ মহা উৎসৱত প্ৰথমবাৰৰ বাবে ভাগ ল'লে নন্দিল বিশ্ব শৰ্মাই।

জীৱনৰ প্ৰথমটো ভোট দি অতি উচ্ছাসিতভাৱে নিজৰ আনন্দ প্ৰকাশ কৰে নন্দিলে। ভোটদানৰ অধিকাৰ সাব্যস্ত কৰি গৌৰৱান্বিত বুলি মন্তব্য কৰা নন্দিলে এইবাৰ যুৱসমাজে উন্নয়ন আৰু প্ৰগতিৰ বাবে ভোট দিছে বুলি মন্তব্য কৰে। অৱশ্যে এয়া তেওঁৰ নিজৰ দৃষ্টিভংগী বুলি উল্লেখ কৰি যুৱসমাজৰ অন্য প্ৰতিনিধিৰ দৃষ্টিভংগী পৃথক হ’বও পাৰে বুলি মন্তব্য কৰে।

ৰাজ্যৰ যুৱসমাজত পিতৃ হিমন্ত বিশ্ব শৰ্মাৰ জনপ্ৰিয়তা দেখি অতিকৈ আনন্দিত অনুভৱ কৰে বুলি মন্তব্য কৰে নন্দিলে। যুৱসমাজে পিতৃৰ নামত মিমছ, কৌতুক, ভিডিঅ' আদি প্ৰচাৰ কৰি আনন্দ প্ৰকাশ কৰা দেখিলে নন্দিলে হেনো নিজেও আনন্দ অনুভৱ কৰে ।

মহাজোঁট সন্দৰ্ভত নন্দিলৰ মন্তব্য হ'ল- মহাজোঁটৰ কোনো উমৈহতীয়া এজেণ্ডা নাই। বিজেপিক পৰাস্ত কৰাটোৱেই মহাজোঁটৰ একমাত্ৰ এজেণ্ডা।

আনহাতে পিতৃৰ পদাংক অনুসৰণ কৰি নন্দিল ৰাজনীতিলৈ আহিব নেকি বুলি সাংবাদিকে কৰা প্ৰশ্নৰ অতি কৌশলেৰে উত্তৰ দিয়ে নন্দিলে। "ৰাজনীতিৰ প্ৰতি মোৰ সিমানেই আকৰ্ষণ আছে যিমান এজন যুৱকৰ থাকিব লাগে।" ৰাজনীতিৰ পথাৰত নমাৰ কোনো পৰিকল্পনা এতিয়ালৈ নাই মন্তব্য কৰি নন্দিলে কয়- ৰাজনীতি হৈছে সাধাৰণ জনতাক সবল কৰা প্ৰক্ৰিয়া।

উল্লেখ্য যে মনোনয়ন পত্ৰ দাখিল আৰু নিৰ্বাচনী প্ৰচাৰৰ অন্তিম দিনা পিতৃ হিমন্ত বিশ্ব শৰ্মাৰ সৈতে আছিল নন্দিল বিশ্ব শৰ্মা।