ভণ্ড তান্ত্ৰিকৰ হাতত BTC শাসনৰ বাঘজৰী! জৰা-ফুকা কৰাৰ নামত এগৰাকী যুৱতীক ধৰ্ষণ কৰাৰ অভিযোগ

ভণ্ড তান্ত্ৰিকৰ হাতত সদ্য ঘোষিত BTC শাসনৰ বাঘজৰী! নাৰী কেলেংকাৰীত অভিযুক্ত BTCৰ GSP দলৰ নতুন পাৰিষদ ঘনশ্যাম দাস। দিহিৰা সমষ্টিৰ GSP দলৰ বিজয়ী প্ৰাৰ্থী ঘনশ্যাম দাসৰ বিৰুদ্ধে ২০১৯ বৰ্ষত গুৱাহাটী মহানগৰীৰ সাতগাওঁ থানাত ৰুজু হৈছিল ১২৫/১৯ নম্বৰত এটা গোচৰ। এই গোচৰৰ ভিত্তিত সাতগাওঁ আৰক্ষীয়ে গ্ৰেপ্তাৰ কৰি জে’ল হাজাতালৈ প্ৰেৰণ কৰিছিল ঘনশ্যামক।

এই ঘটনাটো সংঘটিত হৈছিল ২০১৯ চনৰ এপ্ৰিল মাহত। মহানগৰীৰ এগৰাকী ১৬ বছৰীয়া যুৱতীক নেদেখা শত্ৰুৱে আক্ৰমণ কৰা বুলি বিষ্ণুনগৰৰ ঘনশ্যাম দাস নামৰ বাবা এজনৰ চেম্বাৰলৈ অনা হৈছিল। স্বাস্থ্য পৰীক্ষা কৰি ঘনশ্যাম দাসে যুৱতী গৰাকীৰ দেহত ‘নেদেখা শক্তি’য়ে আশ্ৰয় লৈছে বুলি কোৱাৰ লগতে জৰা-ফুকা কৰিব লাগিব বুলি পৰামৰ্শ দিছিল।

ইয়াৰ পিছতেই ঘনশ্যাম দাসে জৰা ফুকা কৰাৰ নামত এটা বন্ধ কোঠাৰ ভিতৰত যুৱতী গৰাকীক উলংগ কৰি কেইবাবাৰো বলাত্‍কাৰ কৰে বুলি অভিযোগ উত্থাপন হৈছিল।

অৱশেষত ২০১৯ বৰ্ষৰ এপ্ৰিলৰ প্ৰথম সপ্তাহত যুৱতীগৰাকীৰ স্বাস্থ্যৰ পৰিৱৰ্তন হোৱাত পৰিয়ালৰ লোকে যুৱতীগৰাকীক এপলো হাস্পতালত ভৰ্তি কৰায়। চিকিৎসকে যুৱতী গৰাকীয়ে ৯ মাহৰ অন্তসত্ত্বা বুলি পৰিয়ালৰ লোকক জনায়। আৰু দুদিন পিছতে দুৰ্ভগীয়া যুৱতীগৰাকীয়ে জন্ম দিছিল এটি সন্তান।

পিছত যুৱতীগৰাকীয়ে সমস্ত ঘটনাৰ কথা পৰিয়ালৰ লোকক জানিবলৈ দিছিল। আৰু যুৱতীগৰাকীৰ পৰিয়ালে সাতগাওঁ থানাত ঘনশ্যামৰ বিৰুদ্ধে এজাহাৰ দাখিল কৰিছিল। এজাহাৰৰ ভিত্তিত আৰক্ষীয়ে ২০১৯ চনৰ ২৫ এপ্ৰিলত পাঠৰকুৱাৰীৰ বিষ্ণুনগৰৰ চেম্বাৰৰ পৰা ভণ্ডবাবা ঘনশ্যাম দাসক গ্ৰেপ্তাৰ কৰিছিল।