Sarbananda Sonowal : উপনিৰ্বাচনত বিজেপিৰেই জয় হ'ব, ক'লে কেবিনেট মন্ত্ৰীৰ দায়িত্ব লৈ অসমলৈ অহা প্ৰাক্তন মুখ্যমন্ত্ৰী সৰ্বানন্দ সোণোৱালে।

অসমৰ জাতি জনগোষ্ঠী, সত্ৰীয় নৃত্য সংস্কৃতিৰে বৰঝাৰ বিমান বন্দৰত প্ৰাক্তন মুখ্যমন্ত্ৰী সৰ্বানন্দ সোণোৱালক আদৰণি জনালে ৰাজ্যিক বিজেপিৰ কৰ্মকৰ্তাই ৷ বিমান বন্দৰত সোণোৱালক  উষ্ম আদৰণি জনায় মুখ্যমন্ত্ৰী হিমন্ত বিশ্ব শৰ্মায়ো ৷ প্ৰধান মন্ত্ৰী নৰেন্দ্ৰ মোদীৰ কেবিনেটৰ অন্যতম মন্ত্ৰী তথা ৰাজ্যৰ প্ৰাক্তন মুখ্যমন্ত্ৰী সৰ্বানন্দ সোণোৱালৰ অসম আগমনক লৈ স্বাভাবিকতে উৎফল্লিত অসম ৰাজ্যিক বিজেপি ৷ একপ্ৰকাৰ উদূলি মুদূলি বিমান বন্দৰ চৌহদ ৷ দলীয় নেতা কৰ্মীৰ শুভেচ্ছা সম্বোধনা লৈ কেন্দ্ৰীয় মন্ত্ৰীগৰাকীৰ কনভয় আগবাঢ়ে আজাৰা সভা গৃহলৈ ৷ য'ত অঞ্চলটোৰ বিভিন্ন প্ৰান্তৰ পৰা অহা কাৰ্য্যকৰ্তাৰ সৈতে মিলিত হয় সৰ্বানন্দ সোণোৱাল ৷

তাৰপাছতে কেন্দ্ৰীয় মন্ত্ৰীৰ নতুন দায়িত্ব লৈ অসমলৈ অহা মন্ত্ৰীগৰাকীয়ে আশীস ললে সুধাকণ্ঠ ডঃ ভূপেন হাজৰিকাৰ ৷ ভাৰত ৰত্ন ভূপেন হাজৰিকাৰ সমাধিস্থলীত পুষ্প মাল্য অৰ্পণ কৰি শ্ৰদ্ধা জ্ঞাপন কৰে কেবিনেট মন্ত্ৰীগৰাকীয়ে ৷ ইয়াৰ পাছতে উপস্থিত হয় ক্ৰমে শক্তিপীঠ মা কামাখ্যাধাম আৰু বীৰ লাচিতৰ প্ৰতিমূৰ্তি স্থলীত ৷ নৌকা বিহাৰ কৰি পুষ্প মাল্য অৰ্পণ কৰে লাচিতৰ প্ৰতিমূৰ্তিত ৷

অনুষ্ঠানতে ৰাজ্য চৰকাৰৰ ১০০ দিনক লৈ শুভেচ্ছা প্ৰাক্তন মুখ্যমন্ত্ৰীগৰাকীৰ ৷ হিমন্ত বিশ্বৰ ওপৰত বিশ্বাস আছে আগুৱাই নিব পাৰিব ৷ একেসময়তে ৰাজ্যৰ উপনিৰ্বাচনকলৈ সাংবাদিকে কৰা এক প্ৰশ্ন সোণোৱালৰ উত্তৰ আগন্তুক উপনিৰ্বাচনত বিজেপিৰ জয় নিশ্চিত ৷ আটাইকেইখন আসনত বিজেপিয়ে জয়লাভ কৰিব ৷