NEWS18ৰ সাংবাদিক কৃপাঞ্জল ৰাজবংশীক সৰ্বানন্দ শইকীয়া স্মৃতি যুৱ সাংবাদিকতা বঁটা

ৰাজ্যৰ মফচলীয় সংবাদকৰ্মীসকলৰ উমৈহতীয়া সংগঠন আসাম প্ৰেছ ক’ৰেছপণ্ডেন্টছ ইউনিয়ন (আপকু)ৰ শোণিতপুৰ জিলা সমিতিৰ ২০২১-২২ বৰ্ষৰ সাংবাদিকতা বঁটাসমূহ আজি ঘোষণা কৰা হৈছে। আপকুৰ শোণিতপুৰ জিলা সমিতিৰ সভাপতি নাৰায়ণ ফয়েলৰ নেতৃত্বত গঠিত বাছনি সমিতিয়ে আজি ২০২১-২২ বৰ্ষৰ সাংবাদিকতা বঁটা প্ৰাপকসকলৰ নামসমূহ ঘোষণা কৰে।

উল্লেখ্য যে আসাম প্ৰেছ ক’ৰেছপণ্ডেন্টছ ইউনিয়ন (আপকু)ৰ শোণিতপুৰ জিলা সমিতিয়ে সাংবাদিকসকলক উৎসাহিত কৰিবলৈ ২০১৩ বৰ্ষৰ পৰা সাংবাদিকতা বঁটা প্ৰদান কৰি আহিছে ৷ আসাম প্ৰেছ ক’ৰেছপণ্ডেন্টছ ইউনিয়ন (আপকু)ৰ প্ৰতিষ্ঠাপক সদস্য প্ৰয়াত সাংবাদিক কিশোৰ কিৰাটৰ স্মৃতিত প্ৰতিবছৰে প্ৰদান কৰি অহা  সাংবাদিকতা বঁটা ২০২১ বৰ্ষৰ বাবে “অসমীয়া খবৰ”ৰ জ্যেষ্ঠ সাংবাদিক অৰুণিমা কলিতাক আগবঢ়োৱা হৈছে ৷

ইপিনে প্ৰতি দুবছৰৰ মূৰে মূৰে প্ৰদান কৰি অহা সৰ্বানন্দ শইকীয়া স্মৃতি যুৱ সাংবাদিকতা বঁটা ২০২১-২২ বৰ্ষৰ বাবে NEWS18ৰ সাংবাদিক কৃপাঞ্জল ৰাজবংশীক আগবঢ়োৱা হৈছে ৷ অহা বছৰৰ ফেব্ৰুৱাৰীত সাংবাদিকতা বঁটা প্ৰদান অনুষ্ঠানৰ আয়োজন কৰি দুয়োগৰাকী সাংবাদিকক আপকুৰ শোণিতপুৰ জিলা সমিতিয়ে এই বঁটাসমূহ প্ৰদান কৰিব বুলি জিলা আপকুৰ সম্পাদক হৰেণ ভূমিজে এক বিবৃতিযোগে জনাইছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।