হাজোৰ বুল্লুটত ১০–১৫জনীয়া দুৰ্বৃত্তৰ দলে আক্ৰমণ চলালে ফাৰ্মাচীত, লুটি নিলে ডেৰ লক্ষাধিক টকা

হাজোৰ বুল্লুটত উত্তেজনা। বুল্লুট বজাৰৰ আমিনুল মেডিকেল ষ্টোৰ নামৰ এখন ঔষধৰ বিপণীত অতৰ্কিতে আক্ৰমণ ১০-১৫ জনীয়া এটা দুৰ্বৃত্তৰ দলৰ। দুৰ্বৃত্তৰ দলটোৱে প্ৰথমে বিপণীখনৰ তিনিজনকৈ কৰ্মচাৰীক আক্ৰমণ কৰে আৰু তাৰ পিছত মেডিকেল ষ্টোৰখনৰ আচবাব লণ্ডভণ্ড কৰাৰ লগতে লুটি নিলে প্ৰায় ডেৰ লক্ষাধিক টকাসহ বৃহৎ পৰিমাণৰ ঔষধ।

এই আক্ৰমণৰ ফলত গুৰুতৰভাৱে আঘাতপ্ৰাপ্ত হৈছে ঔষধৰ বিপণীখনৰ দুই কৰ্মচাৰী। এই ঘটনা সংঘটিত হোৱাৰ পিছতেই সমগ্ৰ অঞ্চলজুৰি সৃষ্টি হয় এক হাহাকাৰময় পৰিৱেশ। এই ঘটনা সংঘটিত কৰিয়েই ঘটনাস্থলীৰ পৰা পলায়ন কৰে দুৰ্বৃত্তৰ দলটোৱে।

পূৰ্বেও বহু ডকাইতি, এটিএম চুৰি, ধন দাবীৰ দৰে বহু অসামাজিক কাৰ্যকলাপ সংঘটিত কৰাৰ অভিযোগ উত্থাপিত হৈছে এই দুৰ্বৃত্তৰ দলটোৰ বিৰুদ্ধে। ঘটনাস্থলীত হাজো আৰক্ষী উপস্থিত হৈ ঘটনাৰ বুজ লোৱাৰ লগতে দুৰ্বৃত্তৰ দলটোৰ বিৰুদ্ধে আৰম্ভ কৰিছে অভিযান।