মোৰাঝাৰত ভয়ংকৰ ডকাইতি, ব্যৱসায়ীলৈ লক্ষ্য কৰি কেইবাজাঁই গুলীচালনা কৰি ধন লুট, ৰাইজে খেদি খেদি ধৰিলে ২ ডকাইতক

News18 Assam | News18-Assam
Updated:November 15, 2020, 2:49 PM IST
মোৰাঝাৰত ভয়ংকৰ ডকাইতি, ব্যৱসায়ীলৈ লক্ষ্য কৰি কেইবাজাঁই গুলীচালনা কৰি ধন লুট, ৰাইজে খেদি খেদি ধৰিলে ২ ডকাইতক
গাড়ী কেইখনৰ পৰা অনুমানিক বিশ লক্ষাধিক টকা লুট কৰা বুলি স্থানীয় লোকে সন্দেহ কৰিছে৷

গাড়ী কেইখনৰ পৰা অনুমানিক বিশ লক্ষাধিক টকা লুট কৰা বুলি স্থানীয় লোকে সন্দেহ কৰিছে৷

  • Share this:
হোজাইৰ কপাহবাৰীত চাঞ্চল্যকৰ ডকাইতি কাণ্ড৷ আঠ জনীয়া ডকাইতৰ দলে চলন্ত উইংগাৰ গাড়ীৰ পৰা লুটিলে কেইবা লক্ষাধিক টকা৷ স্থানীয় ৰাইজে খেদি খেদি দুই ডকাইতক কৰায়ত্ত কৰি উত্তম–মধ্যম শোধাই গতালে মোৰাঝাৰ আৰক্ষীক৷

হোজাইৰ কপাহবাৰীৰ পদুমপুখুৰী এলেকাত আজি পুৱাৰ ভাগত সংগঠিত হয় এই চাঞ্চল্যকৰ ডকাইতি কাণ্ড৷ আঠজনীয়া ডকাইতৰ এটা দলে পদুমপুখুৰী গাঁৱত ডকাইতি কাণ্ড সংঘটিত কৰাৰ উদ্দেশ্যৰে গড়কাপ্তানী পথত খাপ পিটি আছিল৷ সেই সময়তে উজনি অসমৰ পৰা সাঁচি কাঠ ক্ৰয় কৰাৰ উদ্দেশ্যৰে একাংশ লোকে AS 02BC 5282 নম্বৰৰ দুখন যাত্ৰীবাহী উইংগাৰ আৰু ট্ৰেভেলাৰ গাড়ীত গৈ আছিল৷ পদুমপুখুৰীৰ গাঁৱৰ উক্ত স্থানত ডকাইতৰ দলটোৱে প্ৰথমে গাড়ী কেইখনলৈ লক্ষ্য কৰি গুলীচালনা কৰে আৰু পিছত গাড়ী কেইখনত লুটপাত চলায়৷

গাড়ী কেইখনৰ পৰা অনুমানিক বিশ লক্ষাধিক টকা লুট কৰা বুলি স্থানীয় লোকে সন্দেহ কৰিছে৷ ইফালে, উক্ত ঘটনা সংঘটিত হৈ থকাৰ সময়তে একাংশ স্থানীয় লোকে প্ৰত্যক্ষ কৰি হুলস্থুল কৰে৷ পিছত চাৰিওফালৰ পৰা স্থানীয় লোক ওলায় আহে আৰু খেদি খেদি দুটা ডকাইতক কৰায়ত্ত কৰে। বাকী ছটা ডকাইত পলাই যাবলৈ সক্ষম হয়৷ ৰাইজে ধৃত ডকাইত কেইটাক উত্তম–মধ্যম শোধাই মোৰাঝাৰ আৰক্ষীক গতাই দিয়ে৷

ডকাইত কেইটাৰ পৰা এটা পিষ্টলসহ কেবাজাঁই সক্ৰিয় গুলি উদ্ধাৰ কৰা হয়৷ ধৃত ডকাইতকেইটাৰ নাম ক্ৰমে ৰত্নেশ্বৰ বড়ো আৰু এটোৱা বড়ো ৷ ঘৰ কাৰ্বি আংলং জিলাৰ বকলীয়াত বুলি আৰক্ষীয়ে জানিবলৈ দিয়ে৷ ঘটনাস্থলীত হোজাই জিলা আৰক্ষী প্ৰশাসনৰ উচ্চপদস্থ বিষয়াসকল উপস্থিত হৈ তদন্ত আৰম্ভ কৰাৰ লগতে  বাকীকেইটা ডকাইতক কৰায়ত্ত কৰিবলৈ অভিযান আৰম্ভ কৰিছে৷
Published by: Sanjay Kumar Das
First published: November 15, 2020, 2:49 PM IST
আৰু চাওক
পৰৱৰ্তী বাতৰি

শেহতীয়া বাতৰি

corona virus btn
corona virus btn
Loading