কেনে আছে চলিত বানত কাজিৰঙাত মাতৃৰ পৰা বিচ্ছিন্ন গঁড় পোৱালিটো? 

প্ৰতিবছৰে অহা বানে কাজিৰঙা ৰাষ্ট্ৰীয় উদ্যানৰ বন্যপ্ৰাণীৰ বাবে কঢ়িয়াই আনে দুখ। বানে কাজিৰঙাৰ বহু বন্যপ্ৰাণীৰ পোৱালিক মাতৃৰ পৰা বিচ্ছিন্ন কৰাৰ লগতে বহু মাতৃক সন্তানৰ পৰা চিৰদিনৰ বাবে বিচ্ছিন্ন কৰে ৷

তেনে এটা ১৫ দিনীয়া গঁড় পোৱালি কাজিৰঙা ৰাষ্ট্ৰীয় উদ্যান কৰ্তৃপক্ষই বন্যপ্ৰাণী উদ্ধাৰ প্ৰতিপালন তথা পুনৰ সংস্থাপন কেন্দ্ৰ(CWRC)ৰ সহযোগত ৩০ আগষ্টত কঁহৰা বনাঞ্চলৰ মিহিমুখৰ পৰা উদ্ধাৰ কৰে৷ বৰগছ ৰিজ'ৰ্টৰ পাচলিবাৰীৰ পৰা উদ্ধাৰ কৰা মতা পোৱালিটোক বন্যপ্ৰাণী উদ্ধাৰ প্ৰতিপালন আৰু পুনৰ সংস্থাপন কেন্দ্ৰত ভৰ্তি কৰায়৷ কেন্দ্ৰটোৰ চিকিৎসক ডাঃ চামচুল আলী, ডাঃ ভাস্কৰজ্যোতি চৌধুৰীৰ নেতৃত্বত কেন্দ্ৰটোৰ পৰিচায়ক লক্ষী,তৰুণ,মাইমনহঁত ব্যস্ত হৈ পৰিছে পোৱালিটোক সুস্থ কৰাত ৷

 চিকিৎসকৰ নিৰ্দেশ ক্ৰমে পোৱালিটোৰ মুখত গুজি দিছে নিৰ্ধাৰিত পৰিমাণৰ লেক্ট'জেন গাখীৰ৷ কেতিয়াবা মাতৃৰ পৰা বিচ্ছিন্ন পোৱালিটোৱে অলপ খাইছে কেতিয়াবা অলপো নোখোৱাকৈ মন মাৰি শুই আছে৷ চিকিৎসকৰ মতে, চলিত বানত কাজিৰঙা ৰাষ্ট্ৰীয় উদ্যানত মাতৃৰ পৰা বিচ্ছিন্ন হোৱা প্ৰথম গঁড় পোৱালিটোৰ অৱস্থা এতিয়াও সংকটজনক ৷

মাত্ৰ ১৫ দিনীয়া গঁড় পোৱালিটো যথেষ্ট দুৰ্বল হৈ আছে ৷ মাতৃৰ পৰা বিচ্ছিন্ন পোৱালিটো চকুৰ ৰোগৰ লগতে আন ৰোগতো আক্ৰান্ত। তথাপি চিকিৎসক আৰু পৰিচাৰকসকলে পোৱালিটো সুস্থ কৰিবৰ বাবে আপ্ৰাণ চেষ্টা চলাই আছে৷ বৰ্তমান কেন্দ্ৰটোত পূৰ্বৰ বানত মাতৃৰ পৰা বিচ্ছিন্ন হোৱা চাৰিটা গঁড় পোৱালিৰ লগতে সাতটা হাতীপোৱালি, এটা ম'হ আৰু পাঁচটা নাহৰফুটুকী বাঘ প্ৰতিপালিত হৈ আছে ৷

আনহাতে চলিত বানত উদ্ধাৰ কৰা দুটা ছাগলী, পহুক ইতিমধ্যে পুনৰ মুকলি কৰিছে কেন্দ্ৰ কৰ্তৃপক্ষই৷ ইতিমধ্যে কুৰি বছৰত ভৰি দিয়া বন্যপ্ৰাণী উদ্ধাৰ প্ৰতিপালন আৰু পুনৰ সংস্থাপন কেন্দ্ৰৰ পৰা গঁড়, হাতী, ম'হকে ধৰি বহু বন্যপ্ৰাণীক পুনৰ সংস্থাপন দিছে ৷ উত্তৰ পূৰ্বাঞ্চলৰ একমাত্ৰ কেন্দ্ৰটোত উদ্ধাৰ কৰা বন্যপ্ৰাণীসমূহ সম্পূৰ্ণ বন্য পৰিৱেশত প্ৰতিপালন কৰা হয়।