মমিনুল আৱালক ৰাজ্যিক বিজেপিৰ মুখপাত্ৰৰ দায়িত্বৰ পৰা অব্যাহতি, কাৰ ৰোষত পৰিল আৱাল?

ৰাজু বৰুৱা: BJPৰ ভিতৰচ'ৰাত ধুমুহাৰ সৃষ্টি কৰিছে এটা বিশেষ খবৰে ৷ বিজেপিৰ মুখপাত্ৰৰ দায়িত্বৰ পৰা অব্যাহতি দিছে সংখ্যালঘু উন্নয়ণ বোৰ্ডৰ অধ্যক্ষ মমিনুল আৱালক ৷ কিন্তু অব্যাহতি দিয়াৰ জাননী ৰাজহুৱা কৰাৰ পৰা এখোজ দি দুখোজ পিছুৱাইছে ৰাজ্যিক  নেতৃত্ব ৷ বিজেপিৰ ভিতৰচ'ৰাত ধুমুহাৰ সৃষ্টি কৰিছে মমিনুল আৱালৰ পাখি কটা যোৱাৰ খবৰে ৷ বিভিন্ন মহলত এতিয়া প্ৰশ্ন উত্থাপন কৰিছে যে,  খিলঞ্জীয়াৰ বাবে মাত মাতি এতিয়া বিপদত পৰিছে নেকি আৱাল ?

দীৰ্ঘদিন ধৰি বাংলাদেশী মুছলমানৰ বিৰুদ্ধে আৰু খিলঞ্জীয়া মুছলমানৰ স্বাৰ্থত বিনাদ্বিধাই মাত মতা বিজেপি নেতা মমিনুল আৱালক মুখপাত্ৰৰ দায়িত্বৰ পৰা অব্যাহতি দিছে নেতৃত্বই ৷ কাৰণ এটাই, ২১টা সংগঠনক লৈ বৈঠক কৰিছিল মমিনুল আৱালে ৷

খিলঞ্জীয়া মুছলমানৰ স্বাৰ্থত মাত মতা মমিনুল আৱালে অসম চুক্তিৰ ৬নং দফাৰ জৰিয়তে খিলঞ্জীয়াৰ বাবে সংৰক্ষণ বিচাৰিছিল ২১টা বিধানসভা সমষ্টিৰ জনিয়া, বাঘবৰ, ধিং, চেঙা, ৰূপহীহাটকে ধৰি ২১টা বিধানসভা সমষ্টি সংৰক্ষণৰ বাবে মমিনুল আৱালে কৰা বৈঠকে সভাপতি ৰঞ্জিত দাসৰ ঘনিষ্ঠ আমছুৰ জন্ম দাতা সংখ্যালঘু মৰ্চাৰ সভাপতি মুক্তাৰ হুছেইন খানক আঘাত দিলে ৷ মুক্তাৰ হুছেইন খানৰ আঘাত উপশমৰ দায়িত্ব লৈ ৰণজিত্‍ দাসে বলিৰ পঠা সজালে মমিনুল আৱালক !

মুক্তাৰ হুছেইনৰ কান্ধত বন্দুক থৈ অদূৰ ভৱিষ্যতে নিজৰ পথ নিষ্কণ্টক কৰিবলৈকে মমিনুল আৱালৰ দৰে নিষ্ঠাৱান নেতা এতিয়া চকুৰ কুটা ৰণজিৎ দাসৰ ৷ সৰভোগত নিজৰ ভৱিষ্যৎ ক্ৰমান্বয়ে অন্ধকাৰ হৈ অহাত ৰণজিৎ দাসৰ চকু এতিয়া আন সমষ্টিত ৷ যি সমষ্টিত বৰ্তমান চকু পৰিছে সেই সমষ্টিত জয়ী হ'বলৈ ৰণজিৎ দাসক লাগিব সংখ্যালঘুৰ ভোট ৷ যাৰ বাবে মমিনুল আৱালৰ দৰে নেতাক বলিৰ পঠা সজাই বাংলাদেশী মুছলমানৰ এসময়ৰ প্ৰৱক্তা স্বৰূপ মুক্তাৰ হুছেইন খানৰ হেঁচাত ৰণজিৎ দাসে মুখপাত্ৰৰ দায়িত্বৰ পৰা অব্যাহতি দিলে মমিনুল আৱালক ৷ পিছে এই পৰ্যন্ত জাননীখনহে ৰাজহুৱা কৰিবলৈ সাহস গোটাব পৰা নাই নেতৃত্বই ৷