‘ভুৱা ৰাজসাক্ষীৰে অখিলক ভৰাই থোৱা হৈছে কাৰাগাৰত, মাওবাদীৰ ভূতে খেদিছে বিজেপি চৰকাৰক’

News18 Assam | News18-Assam
Updated:January 11, 2021, 3:54 PM IST
‘ভুৱা ৰাজসাক্ষীৰে অখিলক ভৰাই থোৱা হৈছে কাৰাগাৰত, মাওবাদীৰ ভূতে খেদিছে বিজেপি চৰকাৰক’
৭ জানুৱাৰীত গুৱাহাটী উচ্চ ন়্যায়ালয়ৰ দুজন সন্মানীয় ন্যায়াধীশে প্ৰদান কৰা ৰায়ত অসন্তুষ্ট সদ্যগঠিত ৰাজনৈতিক দল ৰাইজৰ দল৷

৭ জানুৱাৰীত গুৱাহাটী উচ্চ ন়্যায়ালয়ৰ দুজন সন্মানীয় ন্যায়াধীশে প্ৰদান কৰা ৰায়ত অসন্তুষ্ট সদ্যগঠিত ৰাজনৈতিক দল ৰাইজৰ দল৷

  • Share this:
কৃষক নেতা অখিল গগৈৰ জামিন নাকচ কৰি ৭ জানুৱাৰীত গুৱাহাটী উচ্চ ন়্যায়ালয়ৰ দুজন সন্মানীয় ন্যায়াধীশে প্ৰদান কৰা ৰায়ত অসন্তুষ্ট সদ্যগঠিত ৰাজনৈতিক দল ৰাইজৰ দল৷ সোমবাৰে দলটোৰ মুখ্য কাৰ্যালয়ত দলটোৰ উপ-সভাপতি  ভাস্কো ডি শইকীয়া আৰু সম্পাদক কমল মেধিয়ে এক সংবাদমেলযোগে ৭ জানুৱাৰীত অখিল গগৈৰ ক্ষেত্ৰত প্ৰদান কৰা ৰায়ক ত্ৰুটিপূৰ্ণ আৰু পক্ষপাতিত্বমূলক ৰায় বুলি মন্তব্য কৰাৰ লগতে সমগ্ৰ অসমবাসী অসন্তুষ্ট বুলি মত প্ৰকাশ কৰে৷

সংবাদমেলত ৰাইজৰ দলে স্পষ্ট কৰি দিয়ে যে অখিল গগৈৰ জামিন নাকচ কৰি দিয়া ৰায়ত অনেক ত্ৰুটি ৰৈ গৈছে। অখিল গগৈ গ্ৰেপ্তাৰ হোৱা একেই গোচৰৰ ধাৰাতে গ্ৰেপ্তাৰ হোৱা ধৈৰ্য কোঁৱৰ, বিতুল সোণোৱাল আৰু মানস কোঁৱৰে ইতিমধ্যে জামিন লাভ কৰিছে৷ সেয়ে সাদৃশ্যতাৰ ভিত্তিত অখিল গগৈকো জামিন দিব লাগে বুলি যুক্তি প্ৰদৰ্শন কৰিছিল অখিল গগৈৰ অধিবক্তাই৷ কিন্তু আশ্বৰ্যজনকভাৱে আদালতৰ ৰায়ত সেই ক্ষেত্ৰত পেৰাগ্ৰাফ ৪ত কোৱা হৈছে যে আন ৩জন অভিযুক্তও এতিয়া কেন্দ্ৰীয় কাৰাগাৰত ন্যায়িক জিম্মাত আছে৷ ব্যক্তিগত স্বাধীনতাৰ এটা বিষয়ত উচ্চ ন্যায়ালয়ৰ দুজন ন্যায়াধীশৰ এনে দৃষ্টিকটু ত্ৰুটি সঁচাকৈয়ে অতি তাৎপৰ্যপূৰ্ণ বুলি মন্তব্য আগবঢ়াই ৰাইজৰ দলৰ হৈ দুয়োগৰাকী নেতাই৷

ৰাইজৰ দলৰ অভিযোগ, ভুৱা ৰাজসাক্ষীৰে অখিলক ভৰাই থোৱা হৈছে কাৰাগাৰত৷ মাওবাদীৰ ভূতে এতিয়া খেদি ফুৰিছে বিজেপি চৰকাৰক৷ সংবাদমেলত কোৱা হয় যে ৰাইজৰ দলে অচিৰেই অখিল গগৈৰ জামিনৰ বাবে উচ্চতম ন্যায়ালয়ত উচ্চ ন্যায়ালয়ৰ ৰায়ক প্ৰত্যাহ্বান জনাব আৰু উচ্চতম ন্যায়ালয়ে গণতন্ত্ৰৰ পক্ষত ৰায় দি অখিল গগৈক অনতিপলমে জামিন প্ৰদান কৰিব৷

আনহাতে সংবাদমেলত ৰাইজৰ দলে অসম চৰকাৰ তথা ভাৰত চৰকাৰক প্ৰত্যাহবান জনাই কয় যে যুদ্ধৰ মুল সেনাপতিক অবৈধভাৱে বন্দী কৰি ৰাখি কোনো যোদ্ধাই ন্যায় যুদ্ধ নকৰে৷ গতিকে চৰকাৰৰ যদি সাহস আছে অখিল গগৈক মুকলি কৰি দি আগন্তুক বিধানসভা নিবাচনত ৰাইজৰ দলৰে মুখামুখি হবলৈ প্ৰত্যাহ্বান জনাই ৰাইজৰ দলৰ উপ-সভাপতি ভাস্কো ডি শইকীয়া আৰু সম্পাদক কমল মেধিয়ে৷
Published by: Sanjay Kumar Das
First published: January 11, 2021, 3:51 PM IST
আৰু চাওক
পৰৱৰ্তী বাতৰি

শেহতীয়া বাতৰি

corona virus btn
corona virus btn
Loading