দুই বিষয়াৰ মুক্তিৰ বিনিময়ত আলফা(স্বাঃ)ক কোনো প্ৰতিশ্ৰুতি প্ৰদান কৰা নাই কুইপ’ই

অপহৃত বিষয়া ক্ৰমে প্ৰণৱ গগৈ আৰু ৰাম কুমাৰৰ মুক্তিৰ বিনিময়ত আলফা স্বাধীনৰ দাবী এতিয়ালৈ আনুষ্ঠানিকভাৱে গ্ৰহণ কৰা নাই তৈল খনন প্ৰতিষ্ঠান Quippo Oil and Gas Infrastructure Limited–এ। তৈল খনন প্ৰতিষ্ঠানটোৱে ৫০০০ স্থানীয় লোকক প্রত্যক্ষভাৱে সংস্থাপন প্ৰদান কৰাৰ দাবী মানি লৈছে বুলি মধ্যস্থতাকাৰী কৌশিক ফুকনে কৰা মন্তব্যৰ পাছত ফোনযোগে কুইপ’ৰ প্ৰতিনিধিৰে যোগাযোগ কৰিছিল News18–এ।  এই সন্দৰ্ভত আৰু আলোচনাৰ সফল পৰিণতিৰ সন্দৰ্ভত স্পষ্টীকৰণ বিচাৰি SMSও প্ৰেৰণ কৰিছিল News18–এ।  কিন্তু কুইপ’ৰ প্ৰতিনিধিয়ে ‘আলোচনা চলি আছে’ (We are talking) বুলিহে প্ৰত্যুত্তৰ দিয়ে।

তাৰ পিছত প্ৰতিষ্ঠানটোৰ Chief Financial Officer হিচাপে কৰ্মৰত সৌম্য শ্ৰীকান্তে News18ৰে WhatsApp call যোগে হোৱা কথা–বতৰাত আলফা স্বাধীনৰ দাবী মানি লোৱাৰ কথা অস্বীকাৰ কৰে।  ৫০০০ জন স্থানীয় লোকক সংস্থাপন দিয়াৰ সন্দৰ্ভত তেওঁ কয় – উত্তৰ পূবত কুইপ’ত ৮০০ স্থানীয় লোকে প্রত্যক্ষ ৰূপত কাম কৰি আছে। পৰৱৰ্তী সময়ত প্ৰতিষ্ঠানৰ নিজৰ সম্প্ৰসাৰণৰো পৰিকল্পনা আছে আৰু প্ৰতিষ্ঠানটোৱে অঞ্চলটোৰ অৰ্থনৈতিক উত্তৰণতো অৱদান আগবঢ়াব।

প্ৰতিষ্ঠানটোৰ গুৰুগ্ৰামস্থিত কাৰ্যালয়ৰ উচ্চপদস্থ বিষয়াগৰাকীয়ে গগৈ আৰু ৰামৰ মুক্তিৰ বিনিময়ত কোনো মুক্তিপণ পৰিশোধ কৰা নাই বুলিও স্পষ্ট কৰি দিয়ে। তেওঁ কয় – “বিভিন্ন সময়ত দুই অপহৃত ব্যক্তিৰ বিভ্ৰান্তিকৰ বাতৰি আহিছিল। আমি কোনো মুক্তিপণ পৰিশোধ কৰা নাই। আলোচনা চলাই যোৱাত আমি আগ্ৰহী আৰু এতিয়াও আমি মানৱীয়তাৰ খাতিৰত দুয়োকে মুক্তি দিবলৈ আহ্বান জনাইছো। সংবাদ মাধ্যমক প্ৰকাশ কৰা ধৰণে যদিহে দুই ব্যক্তিক মুক্তি দিয়া হয়; সকলোতকৈ সুখী মই হ’ম।’’