Sitajakhala : বৃদ্ধি হ'ব সীতাজখলাৰ পেকেট গাখীৰৰ মূল্য, প্ৰতিলিটাৰ গাখীৰত কিমানলৈ মূল্যবৃদ্ধি?

এইবাৰ বৃদ্ধি পাব সীতাজখলাৰ পেকেট গাখীৰৰ মূল্য ৷ প্ৰতিলিটাৰ গাখীৰত বৃদ্ধি হ'ব ২ ৰ পৰা ৩ টকাকৈ ৷ উৎপাদন মূল্য বৃদ্ধি হোৱাৰ বাবেই এই সিদ্ধান্ত গ্ৰহণ কৰিছে জাগীৰোডৰ সীতাজখলা দুগ্ধ উৎপাদক সমবায় সমিতিয়ে ৷ বুধবাৰে এক সংবাদমেলযোগে এই কথা জনাইছে অধ্যক্ষ ৰঞ্জীৱ শৰ্মাই ৷ আনহাতে কৃষকসকলৰ ক্ষেত্ৰত টোল টেক্স ৰেহাই দিবলৈ চৰকাৰক আহ্বান জনাইছে সীতাজখলাৰ গো-পালকসকলে ৷

ইফালে সীতাজখলা দুগ্ধ উৎপাদক সমবায় সমিতিয়ে (Sitajakhala Dugdha Utpadak Samabai Samiti) ঘোষণা কৰিছে “নন্দলাল উপাধ্যায় ৰাজ্যিক কৃষক বঁটা” ৷ ক’ভিডসৃষ্ট পৰিৱেশৰ বাবে বিগত দুটা বৰ্ষত বঁটা প্ৰদান অনুষ্ঠান আয়োজন কৰিব নোৱাৰাত এইবেলি তিনিটা বৰ্ষৰ বাবে একেলগে ঘোষণা কৰিছে এই বঁটাসমূহ ৷

গোৱালপাৰাৰ ধনুভাঙাৰ সমন্বিত খেতিয়ক দেৱব্ৰত ৰাভালৈ ২০২০ বৰ্ষৰ বঁটা ৷ সমান্তৰালভাৱে গহপুৰৰ মৎস্য পালক অনুপ শৰ্মালৈ আগবঢ়োৱা হৈছে ২০২১ বৰ্ষৰ বঁটা ৷ লগতে বিশ্বনাথৰ জৈৱিক খেতিয়ক নিলম দত্তলৈ ২০২২ বৰ্ষৰ “নন্দলাল উপাধ্যায় ৰাজ্যিক কৃষক বঁটা” ঘোষণা কৰিছে সীতাজখলা দুগ্ধ উৎপাদক সমবায় সমিতিয়ে ৷

আনহাতে এই বঁটাসমূহ প্ৰদান কৰিবলৈ মুখ্যমন্ত্ৰী ড° হিমন্ত বিশ্ব শৰ্মাক নিমন্ত্ৰণ জনাইছে বুলি জানিবলৈ দিয়ে সমবায় সমিতিৰ অধ্যক্ষ ৰঞ্জীৱ শৰ্মাই ৷ উক্ত বঁটা প্ৰদান অনুষ্ঠানতে উন্মোচন কৰা হ'ব প্ৰকাশ কৈৰালাই লিখি উলিওৱা “ভাৰতৰ স্বাধীনতা আন্দোলন আৰু অসমৰ গোৰ্খা মুক্তি যুঁজাৰু সকল” শীৰ্ষক গ্ৰন্থখন ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।