Assam Assembly Election 2021- পুনৰ বঢ়মপুৰত প্ৰফুল্ল কুমাৰ মহন্ত! নিশ্চিত কৰিলে অগপ নেতৃত্বই

অসম গণ পৰিষদৰ হাতত থাকিব বঢ়মপুৰ ৷ অগপৰ কেন্দ্ৰীয় নেতৃত্বই নিশ্চিত কৰিলে এই কথা ৷ সংবাদ মাধ্যমৰ আগত স্পষ্ট কৰিলে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ পত্নী জয়শ্ৰী গোস্বামী মহন্তই ৷

সোমবাৰে অসম গণ পৰিষদৰ দলৰ সভাপতি অতুল বৰাৰ চৰকাৰী বাসগৃহত অনুষ্ঠিত হৈছিল এক গুৰুত্বপূৰ্ণ বৈঠক ৷ বৈঠকলৈ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ পত্নী জয়শ্ৰী গোস্বামী মহন্তকো আমন্ত্ৰণ জনোৱা হৈছিল। সেইমৰ্মে দলৰ কেন্দ্ৰীয় নেতৃত্বৰ বৈঠকত উপস্থিত থাকে জয়শ্ৰী গোস্বামী মহন্ত ৷

বহু সময় ধৰি চলা এই বৈঠকৰ অন্তত অৱশেষত সংবাদ মাধ্যমৰ আগত গোস্বামী মহন্তই জনাই বঢ়মপুৰত অগপই প্ৰাৰ্থীত্ব লাভ কৰাটো নিশ্চিত ৷ অগপৰ প্ৰাক্তন সভাপতি, তথা ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত হ'ব প্ৰাৰ্থী ৷ প্ৰাক্তন মুখ্যমন্ত্ৰীগৰাকীৰ বিকল্প ৰূপে অন্য কোনো অৱতীৰ্ণ নহয় বঢ়মপুৰত ৷

বৰ্তমান দিল্লীত উন্নত চিকিৎসাৰ বাবে থকা প্ৰাক্তন মুখ্যমন্ত্ৰী মহন্ত যথেষ্ট সুস্থ৷ নিৰ্বাচনত প্ৰতিদ্বন্দিতা কৰাত কোনো অসুবিধা নাই ৷ অৱশ্যে প্ৰাক্তন মুখ্যমন্ত্ৰীগৰাকীৰ বিকল্প ৰূপে পুত্ৰ তথা জয়শ্ৰী মহন্তক প্ৰাৰ্থীত্ব দিলে কিবা সমস্যা থাকিব নেকি বুলি সাংবাদিকে কৰা প্ৰশ্নৰ উত্তৰত জয়শ্ৰী গোস্বামীৰ উত্তৰ, এই সকলোবোৰ দলৰ কেন্দ্ৰীয় নেতৃত্বৰ সিদ্ধান্ত।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।