চিলাপথাৰত প্ৰধানমন্ত্ৰীৰ সভা- ১৫ হাজাৰ বাছ, ৮ খন ৰে'লেৰে অনা হ'ল মানুহ

সোমবাৰৰ চিলাপথাৰত অনুষ্ঠিত হোৱা প্ৰধানমন্ত্ৰী নৰেন্দ্ৰ মোদীৰ জনসভাত দেখা গ'ল এক ব্যতিক্ৰমী দৃশ্য। ৰে'লেৰে মানুহ অনা হ'ল প্ৰধানমন্ত্ৰীৰ জনসভালৈ। বাছৰ পৰিৱৰ্তে এইবাৰ প্ৰথমবাৰলৈ ৮ খন ৰে'লেৰে মোদীৰ মিটিঙলৈ মানুহ অনা হ'ল।

অসম বিধান সভা নিৰ্বাচনৰ প্ৰাকমুহুৰ্তত সোমবাৰে দেশৰ প্ৰধানমন্ত্ৰী নৰেন্দ্ৰ মোদীয়ে ধেমাজি জিলাৰ চিলাপথাৰৰ শিতলমাৰী চাপৰিত এখন বৃহৎ ৰাজহুৱা সভাত অংশ লয়। মোদীৰ সভাৰ বাবে ওচৰৰ বিভিন্ন বিধানসভা সমষ্টি ক্ৰমে, জোনাই, ধেমাজি, ঢকুৱাখনা, মাজুলী, লখিমপুৰ, বিহপুৰীয়া, ডিব্ৰুগড়, চাবুৱা, মৰাণ, টিংখং, লাহোৱাল, মাৰ্ঘেৰিটা, তিনিচুকীয়া আৰু শিৱসাগৰ সমষ্টিৰ পৰা মানুহ  অনা হৈছিল।

বিভিন্ন সমষ্টিৰ এই লোকসকলক ১৫ হাজাৰ বাছেৰে অনাৰ উপৰিও প্ৰথমবাৰলৈ ৮ খন ৰে'লেৰ ব্যৱস্থা কৰা হৈছিল। সেয়াই নহয় আটাইকেইখন ৰে'ল নৰেন্দ্ৰ মোদীৰ সভাৰ সন্মুখতে ৰখোৱা হৈছিল।

শাসকীয় দলে প্ৰথমবাৰলৈ ৰাইজক আনিবলৈ ৮ খন ৰে'লৰ ব্যৱহাৰ কৰা কাৰ্যক চোকা ভাষাৰে সমালোচনা কৰিছে বিৰোধী কংগ্ৰেছ দলে।