প্ৰফুল্ল কুমাৰ মহন্তৰ সৈতে সমুজ্জল ভট্টাচাৰ্যৰ গোপন বৈঠক কিয়? CABৰ প্ৰসংগত পৰেশ বৰুৱাৰ বিস্ফোৰণ

News18 Assam | News18-Assam
Updated:December 7, 2019, 6:54 PM IST
প্ৰফুল্ল কুমাৰ মহন্তৰ সৈতে সমুজ্জল ভট্টাচাৰ্যৰ গোপন বৈঠক কিয়? CABৰ প্ৰসংগত পৰেশ বৰুৱাৰ বিস্ফোৰণ
News18ক টেলিফোন কৰি জনালে পৰেশ বৰুৱাই ৷

News18ক টেলিফোন কৰি জনালে পৰেশ বৰুৱাই ৷

  • Share this:
নাগৰিকত্ব সংশোধনী বিধেয়কক লৈ প্ৰতিক্ৰিয়া প্ৰকাশ কৰিছে আলফা (স্বাঃ)ৰ সেনাপ্ৰধান পৰেশ বৰুৱাই। ক'লা বিধেয়কখন কেতিয়াও মানি লোৱা নহ'ব, CAB সন্দৰ্ভত পৰেশ বৰুৱাৰ এইদৰে হুংকাৰ ৷ অসমৰ প্ৰতিবাদকাৰী দল–সংগঠনক তেওঁ আহ্বান জনায়,
সকলো দল-সংগঠন একত্ৰিত হৈ ওলাই আহক ৷ অকলে অকলে আন্দোলন কৰিলে নহ'ব ৷ আছু আৰু কৃষক মুক্তি একত্ৰিত হওক ৷ একেলগ হওক অন্যান্য দল-সংগঠনো।


আছুৰ উপদেষ্টা ডঃ সমুজ্জ্বল কুমাৰ ভট্টাচাৰ্যক সমালোচনা কৰি পৰেশ বৰুৱাই ক'লে-
স্থিতি স্পষ্ট কৰক সমুজ্জ্বলে ৷ ব্যক্তিগত স্বাৰ্থ ত্যাগ কৰি সকলোকে একত্ৰিত কৰক ৷ শুকুৰবাৰে কি গোপন বৈঠকত বহিছিল সমুজ্জ্বল? প্ৰফুল্ল কুমাৰ মহন্তৰ সৈতে কি কথা পাতিলে সমুজ্জ্বলে? বৈঠকত এটা টিভি চেনেলৰ মালিকো আছিল, যাৰ এখন দৈনিক কাকতো আছে ৷ এই গোপন বৈঠক ৰাইজৰ পৰিপন্থী বুলি আমি ভাবিছো ৷ কথাবোৰ সমুজ্জ্বলেে ৰাজহুৱা কৰক ৷


প্ৰাক্তন মুখ্যমন্ত্ৰী প্ৰফুল্ল কুমাৰ মহন্তকো পৰেশ বৰুৱাই সকিয়াই দি কয়-
আঞ্চলিক দলত বিভাজনৰ ৰাজনীতি নকৰিব ৷ পুনৰ মুখ্যমন্ত্ৰী হোৱাৰ বাবে এইবোৰ কৰিছে আপুনি ৷ গুপ্তঘাতক মহন্তক ৰাইজে নিবিচাৰে ৷


নিজৰ দলৰ বিৰুদ্ধেই কাম কৰিছে, একাংশক উচটাইছে মহন্তই ৷ এনে কামৰ পৰা বিৰত থাকিবলৈ মহন্তক সকিয়াই দিয়ে আলফা (স্বাধীন) সেনাপ্ৰধান পৰেশ বৰুৱাই ৷ বৰুৱাই কয়,
AGPৰ তিনি মন্ত্ৰীয়ে দিল্লী নিয়ন্ত্ৰণ নকৰে ৷ AGPৰ তিনি মন্ত্ৰীয়ে CABকো প্ৰতিৰোধ কৰিব নোৱাৰে ৷ সেই কথা জানিও মহন্তই স্বাৰ্থৰ বাবেই ৰাজনীতি কৰিছে ৷ আমি আঞ্চলিক দলটোৰ উন্নতি বিচাৰো ৷ CAB আহিলে AGPয়ে কি কৰিব, তাক নিৰ্ণয় কৰক ৷


প্ৰতিবাদকাৰী নেতাসকলক উদেশ্যি পৰেশ বৰুৱাৰ আহ্বান, নেতাবোৰে ৰাইজক ঠগিবলৈ চেষ্টা নকৰিব ৷ নহ'লে আৰু ৰাইজ কেতিয়াও নাহিব আপোনলোকৰ কাষলৈ ৷ আন্দোলনৰ মাজতে দিল্লীৰ ওচৰত বিক্ৰী নাযাব ৷

পুনৰবাৰ আছুৰ উপদেষ্টা সমুজ্জ্বল কুমাৰ ভট্টাচাৰ্যৰ প্ৰসংগ উত্থাপন কৰি টেলিফোনত পৰেশ বৰুৱাই ক'লে,
সমুজ্জ্বল ভট্টাচাৰ্যই অসমত বৰপীৰা পাৰি দিছিল BJPক ৷ অসমত BJPৰ উত্থাপনৰ মূল মানুহ সমুজ্জ্বল ৷ মাজুলীত সত্ৰাধিকাৰৰ সৈতে কি বৈঠকত বহিছিল সমুজ্জ্বল? সেই বৈঠকত জাতীয় নায়কো আছিল ৷ মোৰ হাতত সকলো তথ্য-প্ৰমাণ আছে ৷


এনেবোৰ কামৰ পৰা আতৰি থাকিবলৈ সমুজ্জ্বল কুমাৰ ভট্টাচাৰ্যক অনুৰোধ জনাই পৰেশ বৰুৱাই ক'লে, সকলোকে একত্ৰিত কৰি CABৰ বিৰুদ্ধে আন্দোলন কৰক ৷ ছাত্ৰ সমাজৰ আপুনি 'পিতা' সদৃশ ৷

সমুজ্জ্বল কুমাৰ ভট্টাচাৰ্যক সমালোচনা কৰাৰ বাবে আছুৰ সদস্যই ভুল নুবুজিব বুলিও পৰেশ বৰুৱাই আহ্বান জনায় ৷

একাংশ বুদ্ধিজীৱীৰ স্থিতিৰ ওপৰতো সন্দেহ ব্যক্ত কৰিলে পৰেশ বৰুৱাই ৷ ক'লে,
উচ্চতম ন্যায়ালয়ত যাব হেনো তেওঁলোক ৷ CABক প্ৰতিহত কৰিবলৈ SCত যায়? SCক কোনে নিয়ন্ত্ৰণ কৰে, তাকেই নাজানে নেকি? ভাৰতীয় সংবিধান, গণতন্ত্ৰই আমাক একো দিয়া নাই ৷
First published: December 7, 2019, 1:32 PM IST
আৰু চাওক
পৰৱৰ্তী বাতৰি

শেহতীয়া বাতৰি