বছৰৰ আৰম্ভণিতে ভাল খবৰ, AMCHত প্ৰথমবাৰৰ বাবে কাৰ্যক্ষম হ’ল দুটা বৃহৎ অক্সিজেন জেনেৰেশ্যন প্লাণ্ট

ইংৰাজী নৱবৰ্ষৰ আৰম্ভণিতেই উত্তৰ–পূৰ্বাঞ্চলৰ প্ৰথমখন চিকিৎসা মহাবিদ্যালয়ত সংযোজন হোৱা এটা বিশেষ পদক্ষেপে কঢ়িয়াই আনিছে সুখবৰ। ডিব্ৰুগড়স্থিত অসম চিকিৎসা মহাবিদ্যালয়ত ভাৰত চৰকাৰৰ উদ্যোগত তথা অসম চৰকাৰৰ তত্বাৱধানত তিনিমাহ পূৰ্বৰে পৰা নিৰ্মাণ কৰা Oxygen generation plant দুটা আজিৰে পৰা পৰীক্ষামূলকভাৱে কাৰ্যক্ষম কৰা হৈছে।

ইয়াৰ লগে লগে শ শ ৰোগীলৈ কঢ়িয়াই আনিছে সকাহ। বৃহৎ দুটা অক্সিজেন জেনেৰেশ্যন প্লাণ্টত মুঠ ৪০ হাজাৰ কেজি লিকুইড গেছ সংৰক্ষণ কৰি তাক অক্সিজেনলৈ ৰূপান্তৰিত কৰাৰ ব্যৱস্থা কৰা হৈছে। অক্সিজেন উৎপাদৰ এই ব্যৱস্থা অসম চিকিৎসা মহাবিদ্যালয়তে আৰম্ভ কৰাত এতিয়াৰে পৰা বিগত সময়চোৱাত সৃষ্টি হোৱা অক্সিজেনৰ নাটনি দূৰ হোৱাত যথেষ্ট সহায়ক হৈ পৰিব বুলি সদৰী কৰিছে চিকিৎসা মহাবিদ্যালয়খনৰ অধ্যক্ষ ডাঃ সঞ্জীৱ কুমাৰ কাকতি আৰু অধীক্ষক ডাঃ প্ৰশান্ত দিহিঙ্গীয়াই।

অক্সিজেন জেনেৰেশ্যন প্লাণ্ট দুটা কাৰ্যক্ষম হৈ উঠাৰ লগে লগে মেডিচিন আই চি ইউ, চেন্ট্ৰেল আই চি ইউ, কোভিড আই চি ইউৰ ৰোগীক প্ৰয়োজনী অক্সিজেন যোগান ধৰিবলৈ সক্ষম হৈছে। উল্লেখযোগ্য যে এই পদক্ষেপৰ ফলত চিকিৎসা মহাবিদ্যালয়খনৰ বৃহৎ অংকৰ ধন ৰাহি হ'ব। বিগত সময়ছোৱাত অসম চিকিৎসা মহাবিদ্যালয়ে আন ঠাইৰ পৰা অক্সিজেন ক্ৰয় কৰি আহিছিল আৰু বিভিন্ন সময়ত  অক্সিজেনৰ নাটনিও হৈছিল।

বৰ্তমান দুটাকৈ উচ্চ ক্ষমতাসম্পন্ন টেংক সদৃশ অক্সিজেন জেনেৰেশ্যন প্লাণ্ট সংস্থাপন কৰাত এই সমস্যা দূৰ হ'ব বুলি আশা কৰা হৈছে। ইপিনে ২০২১ ৰ আৰম্ভণিতেই এনে এটা ব্যৱস্থা কাৰ্যক্ষম কৰিবলৈ সক্ষম হোৱাত সন্তোষ প্ৰকাশ কৰিছে অসম চিকিৎসা মহাবিদ্যালয়ৰ কৰ্তৃপক্ষই।