MARIGAON : মৰিগাঁও জিলাৰ একমাত্ৰ কেন্দ্ৰীয় বিদ্যালয়লৈ অশনি সংকেত, নগাঁও কাগজ কল বন্ধৰ পিছতে বিদ্যালয়তো অচলাৱস্থা

হিন্দুস্থান কাগজ নিগমৰ অধীনৰ জাগীৰোডস্থিত নগাঁও কাগজ কল বন্ধ হোৱাৰ পিছত এইবাৰ বন্ধ হোৱাৰ দিশে গতি কৰিছে কাগজ কলৰ ভিতৰত অৱস্থিত মৰিগাঁও জিলাৰ একমাত্ৰ কেন্দ্ৰীয় বিদ্যালয়খন ৷

কেন্দ্ৰীয় মানৱ সম্পদ উন্নয়ন দপ্তৰৰ অধীনত থকা কেন্দ্ৰীয় বিদ্যালয়খনলৈ শেহতীয়াকৈ নামি আহিছে অশনি সংকেত ৷ কেইবাগৰাকীও অভিভাৱকে জনোৱা অনুসৰি, বিভিন্ন সমস্যাৰে জৰ্জৰিত বিদ্যালয়খনত শেহতীয়াকৈ বন্ধ কৰি দিয়া হৈছে ২০২২-২৩ বৰ্ষৰ প্ৰথম আৰু একাদশ শ্ৰেণীৰ নামভৰ্তি প্ৰক্ৰিয়া ৷

অৱশ্যে এই সন্দৰ্ভত কোনো মন্তব্য প্ৰকাশ কৰা নাই বিদ্যালয়ৰ অধ্যক্ষই ৷ জানিব পৰা মতে, বিগত কেইবা বছৰ ধৰি কেন্দ্ৰীয় বিদ্যালয়খনত সৃষ্টি হৈ আহিছে অচলাৱস্থাৰ ৷ যিয়ে বিদ্যালয়খন বন্ধ হৈ যোৱাৰ এক ইংগিত বহন কৰা বুলি শংকাত ভুগিছে স্থানীয় লোকে ৷ ইয়াকে লৈ চিন্তিত হৈ পৰিছে জাগীৰোডৰ শৈক্ষিক সমাজৰ লগতে অভিভাৱক সকলো ৷

নগাঁও কাগজ কলৰ অধীনত এখন প্ৰজেক্ট স্কুল হিচাপে কেন্দ্ৰীয় বিদ্যালয়খন চলি আছিল যদিও শেহতীয়াকৈ কাগজ কলটো বন্ধ হৈ পৰাত অন্ধকাৰৰ দিশে গতি কৰিছে বিদ্যালয়খনত অধ্যয়নৰত শ শ ছাত্ৰ-ছাত্ৰীৰ ভৱিষ্যত ৷

ইফালে কাগজ কলৰ সকলো সা-সম্পত্তি অসম চৰকাৰৰ অধীনত অহাৰ পিছতো যদি জিলাখনৰ একমাত্ৰ কেন্দ্ৰীয় বিদ্যালয়খনো বন্ধ হৈ পৰে, তেন্তে ই সমগ্ৰ অসমৰ লগতে মৰিগাঁও জিলাবাসীৰ বাবেই এক দুৰ্ভাগ্যজনক বিষয় হ'ব বুলিও আক্ষেপ প্ৰকাশ কৰিছে অভিভাৱকসকলে ৷

জিলাখনৰ একমাত্ৰ কেন্দ্ৰীয় বিদ্যালয়খন ৰক্ষাৰ স্বাৰ্থত জাগীৰোড সমষ্টিৰ জনপ্ৰিয় বিধায়ক তথা অসম চৰকাৰৰ মন্ত্ৰী পীয়ূষ হাজৰিকাৰ হস্তক্ষেপ বিচাৰিছে জাগীৰোডৰ শৈক্ষিক মহলে।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।