অইল ইণ্ডিয়া লিমিটেডৰ কাণ্ডজ্ঞানহীনতাৰ বাবে শংকিত নুমলীগড়ৰ জনসাধাৰণ!

অইল ইণ্ডিয়া লিমিটেডৰ কাণ্ডজ্ঞানহীনতাৰ বাবে শংকিত হৈছে নুমলীগড়ৰ জনসাধাৰণ৷ অইল ইণ্ডিয়াৰ ভুলৰ বাবে নুমলীগড়ৰ কাষৰীয়া কমাৰগাঁও তামুলীপথাৰত খাৰুৱা তেল নিৰ্গত হোৱাত বাঘজান কাণ্ডৰ দৰে ঘটনা সংঘটিত হোৱাৰ আশংকা স্থানীয় ৰাইজৰ লগতে দল-সংগঠনৰ৷ ঘটনাৰ স্থান নুমলীগড়ৰ সমীপৱৰ্তী কমাৰগাঁও আৰক্ষী চকীৰ অন্তৰ্গত তামুলীপথাৰ ৷

এই স্থানত ভয়াৱহভাৱে তেল নিৰ্গত হৈছে অইল ইণ্ডিয়া লিমিটেডে স্থাপন কৰা পাইপৰ পৰা৷ তেল নিৰ্গত হোৱাৰ ফলত মূৰৰ ঘাম মাটিত পেলাই কৰা শালিধানৰ খেতি এফালৰ পৰা ৰঙা পৰি যোৱাৰ লগতে গুৰিতে গেলি গৈছে। উল্লেখ যে খাৰুৱা তেল পৰিবাহী এডাল পাইপ কিছুদিনৰ আগতে অইল ইণ্ডিয়া কতৃপক্ষই স্থাপন কৰিছিল। তামুলীপথাৰ অঞ্চলৰ কৃষিপথাৰ মাজেৰে প্ৰৱাহিত পাইপ ডাল স্থাপন কৰা স্থলীত বৰ্তমান খাৰুৱা তেল নিৰ্গত হৈ  অঞ্চলটোৰ কৃষকসকলৰ শালিধানৰ খেতিৰ বিস্তৰ ক্ষতি সাধন হোৱাত এতিয়া মূৰে–কপালে হাত দিছে দুৰ্ভগীয়া কৃষকসকলে।

উল্লেখযোগ্য যে নতুনকৈ স্থাপন কৰা খাৰুৱা তেল পৰিবাহী পাইপডাল স্থাপন কৰা স্থানত  মাটিৰ তলৰ পৰা বুৰবুৰণি হৈ থকা দেখি আতংকিত হৈছে স্থানীয় ৰাইজ। আনহাতে তেল পৰিবাহী পাইপডাল অইল ইণ্ডিয়াই বিসংগতিপূৰ্ণভাৱে স্থাপন কৰাৰ সন্দেহ কৰিছে স্থানীয় কৃষকসকলে। যাৰ পৰিপ্ৰেক্ষিতত কাষৰীয়া কৃষি ভূমিৰ প্ৰায় দহ বিঘা শালি ধানৰ খেতি জ্বলি নষ্ট হৈছে বুলি অভিযোগ কৰিছে স্থানীয় কৃষকসকলে।

ইফালে, তামুলীপথাৰৰ কৃষিপথাৰত খাৰুৱা তেল নিৰ্গত হৈ খেতি পথাৰ নষ্ট হোৱাত এতিয়া অইল ইণ্ডিয়াৰ বিৰুদ্ধে জাঙুৰ খাই উঠিছে তাই আহোম ছাত্ৰ সন্থা। তাই আহোম ছাত্ৰ সন্থাৰ গোলাঘাট জিলা সমিতিৰ যুটীয়া সম্পাদক দীপজ্যোতি তামুলীয়ে অইল ইণ্ডিয়া কৰ্তৃপক্ষৰ চূড়ান্ত অনিয়মৰ বাবে কৃষকসকলে মূৰৰ ঘাম মাটিত পেলাই কৰাৰ খেতি খাৰুৱা তেল নিৰ্গত হৈ  নষ্ট হোৱাত কৃষক সকলক উচিত ক্ষতিপূৰণ দিয়াৰ লগতে শীঘ্ৰে অইল ইণ্ডিয়া কৰ্তৃপক্ষক উক্ত স্থান পৰিদৰ্শন কৰি উক্ত সমস্যাৰ সমাধান কৰিবলৈ আহ্বান জনাইছে।