ঘৰভাৰা দিব নোৱাৰাৰ কাৰণে ঘৰৰ মালিকে গাত ঢালিলে কেৰাচিন! কণ কণ সন্তানসহ মাজনিশা ৰাজপথত মহিলা

তলাবন্ধৰ মাজতে বঙাইগাঁৱত সংঘটিত হৈছে এক মৰ্মান্তিক ঘটনা ৷ মাহেকীয়া ভাৰা আদায় দিব নোৱাৰাৰ বাবে গাত কেৰাচিন ঢালি ভাৰাতীয়াক উলিয়াই দিলে মালিকে ৷ বিত্ত মন্ত্ৰী ড° হিমন্ত বিশ্ব শৰ্মাই ভাৰাতীয়াক পঞ্চাছ শতাংশ ধন ৰেহাই দিয়াৰ বাবে ঘৰৰ মালিকসকলোক অনুৰোধ জনাই থকাৰ সময়তে বঙাইগাঁৱত দুৰ্ভাগ্যজনক এই ঘটনা সংঘটিত হ’ল ৷ তলা বন্ধৰ মাজত ঘৰ ভাৰা আদায় দিব নোৱাৰাৰ বাবে মালিকে গাত কেৰাচিন তেল ঢালি উলিয়াই দিলে মহিলাক ৷

মালিকৰ এনে অমানৱীয় কাণ্ডৰ বাবে কণ কণ দুটি সন্তানক লৈ নিশা নিৰাশ্ৰয় হৈ ৰাজপথত ঘুৰি ফুৰিবলগীয়া হ’ল দুৰ্ভগীয়া মহিলাই ৷ বিগত প্ৰায় তিনি বছৰ ধৰি ৪০ বছৰীয়া মহিলাগৰাকীয়ে দুই সন্তানক লৈ সুন্দৰী দাসৰ ঘৰত ভাড়া আছিল ৷

বিগত সময়ত মালিকক সময় মতে ভাৰা আদায় দি আহিলেও শেহতীয়াভাৱে তলাবন্ধৰ ফলত পদপথত দোকান দি পৰিয়াল পোহ পাল দি অহা মহিলাগৰাকীৰ আৰ্থিক উপাৰ্জন বন্ধ হৈ পৰে ৷ ইয়াৰ পিছতো সুন্দৰী দাস নামৰ মহিলাগৰাকীয়ে ঘৰভাৰাৰ বাবে হেঁচা দি অহাত ভাৰাতীয়া মহিলাগৰাকীয়ে আৰ্থিক সংকটৰ বাবে কেইদিন মানৰ পিছত ধন আদায় ল’বলৈ অনুৰোধ জনাই আহিছিল ৷ কিন্তু অসহায় ভাৰাতীয়া মহিলাগৰাকীৰ অনুৰোধ অগ্ৰাহ্য কৰি মালিকে বিভিন্ন কটু মন্তব্য কৰাৰ লগতে ঘৰ খালী কৰাৰ নিৰ্দেশ দিয়ে ৷ তলাবন্ধৰ বাবে ঘৰ এৰিবলৈ সক্ষম নোহোৱাত সুন্দৰী দাসে ভাৰাতীয়া মহিলাগৰাকীক সোমবাৰে নিশা অশ্লীল গালি গালাজ আৰু ভয় ভাবুকি প্ৰদান কৰিয়ে ক্ষান্ত নাথাকি গাত কেৰাচিন পৰ্যন্ত ঢালি দিয়ে ৷ মালিক সুন্দৰী দাসে নিজে ভাৰাতীয়া মহিলাৰ গাত কেৰাচিন ঢালি দি ক’লে 'ওলাই যা নহলে সন্তানসহ জ্বলাই দিম ৷' মালিকৰ এনে অমানৱীয় কাণ্ডত দুই কণ কণ সন্তানসহ মহিলাগৰাকীয়ে ঘৰ এৰি ৰাজপথলৈ ওলাই আহিবলৈ বাধ্য হয় ৷ বলপূৰ্বক ঘৰৰ পৰা উলিয়াই দিয়াৰ পিছত অসহায় আৰু নিৰাশ্ৰয় মহিলাগৰাকীয়ে পাঁচ আৰু সাত বছৰীয়া দুই সন্তানক লগত লৈ নিশা ৰাজপথত ঘুৰি ফুৰি অৱশেষত উত্তৰ বঙাইগাঁও আৰক্ষী চকীত আশ্ৰয় গ্ৰহণ কৰে ৷

ইতিমধ্যে দুৰ্ভগীয়া মহিলাগৰাকীয়ে ভাৰাঘৰৰ মালিক সুন্দৰী দাসৰ বিৰুদ্ধে থানাত এজাহাৰ দাখিল কৰিছে ৷ অসহায় মহিলাগৰাকীয়ে কয় যে 'বিগত প্ৰায় তিনি বছৰ ধৰি সুন্দৰী দাস নামৰ মহিলাৰ ঘৰত ভাৰাতীয়া হৈ আছো ৷ প্ৰতি মাহে বিদ্যুৎ মাচুলৰ লগতে ৩২০০ টকাকৈ ভাৰা আদায় দি আহিছো ৷ তলাবন্ধৰ ফলত কাম কাজ বন্ধ হৈ পৰাৰ সময়তে এপ্ৰিল মাহত দিবলগীয়া ঘৰ ভাৰা দাবী কৰে ৷ দুই সন্তানৰ ভাত মুঠি যোগাৰ কৰাটো টান হৈ পৰাৰ সময়তে মালিকনীয়ে অহৰহ ভাৰা আদায় দিবলৈ হেঁচা দি আহিছিল ৷ নিশা দুুুই সন্তানৰ সৈতে প্ৰাণৰ মমতাৰ কথা চিন্তা কৰি এই নিশা ঘৰ এৰি ৰাজপথলৈ ওলাই আহিবলগীয়া হ’ল ৷ ' পিছত আৰক্ষীয়ে মহিলা গৰাকীৰ আত্মীয়ক খবৰ দি সন্তানসহ মহিলাগৰাকীক নিশাটো তেওঁলোকৰ ঘৰত ৰখাৰ ব্যৱস্থা কৰে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।