গুৱাহাটী কেন্দ্ৰীয় কাৰাগাৰত অসুস্থ হৈ থকা অখিল গগৈ, ধৈৰ্য কোঁৱৰ, বিতু সোণোৱালৰ কোভিড পৰীক্ষা কৰাৰ নিৰ্দেশ NIAৰ বিশেষ আদালতৰ

নাগৰিকত্ব সংশোধনী বিধেয়কবিৰোধী আন্দোলনৰ পৰাই  প্ৰায় ৬ মাহতকৈ অধিক কাল কাৰাগাৰত বন্দী হৈ আছে কৃষক মুক্তি সংগ্ৰাম সমিতিৰ নেতা অখিল গগৈ, ধৈৰ্য কোঁৱৰ, বিতু  সোণোৱাল আৰু মানস কোঁৱৰ৷ ৰাজ্যজুৰি কোভিড আক্ৰান্তৰ সংখ্যা বৃদ্ধি পোৱাৰ লগে লগে শংকিত গুৱাহাটী কেন্দ্ৰীয় কাৰাগাৰ কৰ্তৃপক্ষ। কিছুদিনৰ পৰা অখিল গগৈ, ধৈৰ্য কোঁৱৰ আৰু বিতু সোণোৱাল জ্বৰ, মূৰৰ বিষত আক্ৰান্ত হৈ আছে ৷ কিন্তু কাৰাগাৰ কৰ্তৃপক্ষই কোনোধৰণৰ চিকিৎসা ব্যৱস্থা নকৰাৰ বাবে অধিবক্তাই চিকিৎসা  বিচাৰি আবেদন জনায় NIAৰ বিশেষ আদালতত৷

আদালতে আজি ভিডিঅ’ কনফাৰেন্সিঙৰ মাধ্যমত ধৈৰ্য কোৱঁৰ আৰু বিতু সোণোৱালৰ শুনানি গ্ৰহণ কৰে৷ আনহাতে, গুৰুত্বৰভাৱে অসুস্থ অখিল গগৈ উপস্থিত থাকিব নোৱাৰিলে ভিডিঅ’ কনফাৰেন্সত৷ আদালতে আবেদনৰ শুনানি গ্ৰহণ কৰি অসুস্থ তিনিওৰে কোভিড পৰীক্ষা আৰু প্ৰয়োজনীয় চিকিৎসা কৰাৰ নিৰ্দেশ দিয়ে ৰাজ্য চৰকাৰক৷ আনহাতে, মানস কোঁৱৰৰ জামিন আবেদনৰো শুনানি গ্ৰহণ কৰে আদালতে৷ অভিযুক্ত পক্ষৰ অধিবক্তাৰ যুক্তিৰ শুনাৰ পিছত বুধবাৰে NIAৰ অধিবক্তাই দাঙি ধৰিব যুক্তি৷