অখিল গগৈয়ে কি কি পৰামৰ্শ দিছিল অসম চুক্তিৰ ৬ নং দফা ৰূপায়ণ কমিটিক? News18ৰ হাতত সবিশেষ

অসম চুক্তিৰ ৬ নং দফা ৰূপায়ণ কমিটিক বিস্তৃত ৰূপত পৰামৰ্শ আগবঢ়াইছিল কৃষক মুক্তি সংগ্ৰাম সমিতিৰ নেতা অখিল গগৈয়ে। কমিটিৰ সন্মুখত গগৈৰ নেতৃত্বত কৃষক মুক্তি সংগ্ৰাম সমিতিৰ এক প্ৰতিনিধি দলে মৌখিক ভাবে এই পৰামৰ্শ সমূহ প্ৰদান কৰাৰ লগতে দাখিল কৰিছিল এখন দস্তাবেজ ।

কি আছিল অখিল গগৈৰ পৰামৰ্শ সমূহ? News18 Assam NE ৰ হাতত আহি পৰিছে অখিল গগৈয়ে দাখিল কৰা পৰামৰ্শ সমূহৰ পত্ৰ । কি আছে পৰামৰ্শ পত্ৰ খনত

• ভাৰতীয় সংবিধানৰ অনুচ্ছেদ ১১ ৰ সংশোধনী ঘটাই অসমৰ বেলিকা নাগৰিকত্ব প্ৰদান আৰু কৰ্তনৰ ক্ষেত্ৰত দেশৰ সংসদে অসম বিধান সভাৰ পূৰ্বে অনুমোদন নোলোৱাকৈ কোনো  সিদ্ধান্ত গ্ৰহণ কৰিব নোৱাৰিব ।

• ভাৰতীয় সংবিধানৰ অনুচ্ছেদ ৩ ৰ সংশোধনী ঘটাই অসমৰ বর্তমানৰ পৰিসীমাৰ সালসলনি ঘটোৱাৰ ক্ষেত্ৰত দেশৰ সংসদে আইন প্ৰণয়নৰ পূৰ্বে অসম বিধান সভাৰ অনুমোদন লোৱাটো বাধ্যতামূলক হওক ।

• ভাৰতীয় সংবিধানৰ অনুচ্ছেদ ১৬(৩) ৰ সংশোধন কৰি ২০১৯ চনত প্ৰকাশ পোৱা ৰাষ্ট্ৰীয় নাগৰিক পঞ্জীত স্থান পোৱা লোক সকলকহে Permanent Residential Certificate প্ৰদান কৰা হওক ।

• অসমীয়া ভাষাক সাংবিধানিক সুৰক্ষা প্ৰদান কৰক । তাৰ কাৰণে ভাৰতৰ ৰাষ্ট্ৰপতিয়ে অসম বিধান সভাৰ অনুমোদন নোলোৱাকৈ অসমীয়া ভাষাৰ বেলিকে অনুচ্ছেদ ৩৪৭ ৰ সালসলনি ঘটাব নোৱাৰাটো বাধ্যতামূলক কৰক ।

• ভূমি আৰু সম্পদৰ মালিকীস্বত্ব আৰু স্থানান্তৰৰ ক্ষেত্ৰত অসম বিধান সভাত গৃহীত নকৰাকৈ সংসদে গৃহীত কৰা কোনো আইন প্ৰযোজ্য নহওক । অৰ্থাৎ অনুচ্ছেদ ৩৭১ B ৰ বিপৰীতে অসমত অনুচ্ছেদ ৩৭১A আৰু ৩৭১G লাগু কৰক ।

• অসম বিধান সভাই ভূমিৰ মালিকীস্বত্ব আৰু স্থানান্তৰ সন্দৰ্ভত তেনে অধিকাৰ ২০১৯ চনৰ নাগৰিক পঞ্জীত নাম থকা সকলৰ ভিতৰত সীমিত ৰখাৰ নিয়ম প্ৰস্তুত কৰি বিশেষ আইন প্ৰণয়ন কৰক ।

• ১৯৫১ চনৰ ৰাষ্ট্ৰীয় নাগৰিক পঞ্জী আৰু একে বছৰৰ ভোটাৰ তালিকাত নাম থকা লোক সকলৰ সতি সন্ততিৰ কাৰণেহে বিধান সভা আৰু লোক সভাত আসন সংৰক্ষণৰ দিশত সংসদত আইন প্ৰণয়ন হওক ।

• ৰাষ্ট্ৰপতিয়ে কেন্দ্ৰ বা ৰাজ্য চৰকাৰৰ দ্বাৰা পৰিচালিত বা আৰ্থিক সাহায্য প্ৰাপ্ত শিক্ষানুষ্ঠানত অসমীয়া শিক্ষাৰ্থীৰ কাৰণে আসন সংৰক্ষণৰ দিশত বিশেষ নিৰ্দেশ প্ৰদান কৰক ।

• কেন্দ্ৰীয় আৰু ৰাজ্য চৰকাৰৰ নিয়োগটো অসমীয়াৰ কাৰণে আসন সংৰক্ষণ কৰাৰ দিশটোত পদক্ষেপ লওক ।

• সংবিধানৰ অনুচ্ছেদ ১৬৯ ৰ অধীনত অসমত উচ্চ সদন গঠন হওক আৰু এই সদনত ৰাজ্য খনৰ Ethnic Community ৰ লোকৰ কাৰণে আসন সংৰক্ষণ কৰা হওক ।

• অসমৰ ভাষা, সংস্কৃতি, সাহিত্য, সংহতি ৰক্ষাৰ কাৰণে আইন প্ৰণয়ন হওক ।