বাঁহৰ জুপুৰীত থাকে কেন্দ্ৰীয় মন্ত্ৰী ৰামেশ্বৰ তেলীৰ পৰিয়াল, আপুনি জানেনে ৰামেশ্বৰ তেলীৰ এইকেইটা কথা?

দুবাৰকৈ ডিব্ৰুগড়ৰ পৰা সাংসদ হিচাপে নিৰ্বাচিত হোৱা ৰামেশ্বৰ তেলীয়ে স্থান লাভ কৰিলে মোদী মন্ত্ৰীসভাত। বৃহস্পতিবাৰে প্ৰধানমন্ত্ৰী নৰেন্দ্ৰ মোদীৰ লগতে শপত ল’লে টীম মোদীৰ আন ৫৭গৰাকী সদস্যই। হিন্দীতে পদ আৰু গোপনীয়তাৰ শপত বাক্য পাঠ কৰিলে ৰামেশ্বৰ তেলীয়ে। মোদী মন্ত্ৰীসভাত স্থান লাভ কৰি সংবাদমাধ্যমৰ আগত তেলীয়ে প্ৰধানমন্ত্ৰী নৰেন্দ্ৰ মোদী আৰু অমিত শ্বাহক ধন্যবাদ জ্ঞাপন কৰে। এই দিনটো এক স্মৰণীয় দিন বুলিও উল্লেখ কৰে তেলীয়ে।

জানো আহক তেলীৰ বিষয়ে ১০টা কথা :
১. ৰামেশ্বৰ তেলীৰ জন্ম হৈছিল ১৯৭০ চনৰ ১৪ আগষ্টত। ডিব্ৰুগড়ৰ টিপলিঙত জন্ম তেলীৰ। পিতৃৰ নাম বুধু তেলী আৰু মাতৃৰ নাম ডুকলা তেলী।

২. তেলীৰ বিৰুদ্ধে নাই কোনো অপৰাধজনিত গোচৰ। তেওঁৰ সম্পত্তিৰ পৰিমাণ ১০ লাখতকৈ কম। ১৯৯৯ চনত বিজেপিত যোগদান কৰিছিল তেলীয়ে।

৩. দুলীয়াজানৰ পৰা দুবাৰকৈ বিধায়ক হিচাপে নিৰ্বাচিত হৈছে তেলী। ২০০১–২০০৬ আৰু ২০০৬–২০১১ চনলৈ দুলীয়াজানৰ বিধায়ক আছিল তেলী।



৪. ২০০১ চনত প্ৰথমবাৰৰ বাবে বিজেপি দলৰ পৰা বিধানসভা নিৰ্বাচনত অৱতীৰ্ণ হৈছিল ৰামেশ্বৰ তেলী। তেওঁ কংগ্ৰেছৰ প্ৰাৰ্থীক পৰাজিত কৰি নিৰ্বাচিত হৈছিল বিধায়ক হিচাপে।

৫. ২০১১ চনত অমিয়া গগৈৰ সৈতে ৩০০০ ভোটত পৰাজিত হৈছিল ৰামেশ্বৰ তেলী।

৬. জনপ্ৰিয় চাহ জনগোষ্ঠীয় নেতা তেলীয়ে এইবাৰ লোকসভা নিৰ্বাচনত ৩.৬ লাখ ভোটৰ ব্যৱধানত পৰাস্ত কৰে কংগ্ৰেছৰ ৫ বাৰৰ সাংসদ পৱন সিং ঘাটোৱাৰক।

৭. ২০১৪ চনৰ লোকসভা নিৰ্বাচনত তেলীয়ে ১.৮৫ লাখ ভোটত পৰাজিত কৰিছিল পৱন সিং ঘাটোৱাৰক।

৮. ৰামেশ্বৰ তেলীৰ শিক্ষাগত অৰ্হতা উচ্চতৰ মাধ্যমিক উত্তীৰ্ণ।

৯. জীৱন–যাপনৰ সাধাৰণ শৈলীৰ বাবে সমষ্টিত জনপ্ৰিয় ৰামেশ্বৰ তেলী। তেওঁৰ পৰিয়াল বাস কৰে বাঁহৰ জুপুৰীত। তেওঁৰ খুৰাক এজন ঠেলাচালক।

১০. নিজ সমষ্টিত তেলীয়ে বাঁহ–বেতেৰে তৈয়াৰী কাৰ্যালয়ৰ পৰাই কাম–কাজ চোৱাচিতা কৰে।