মুকুটাৰ খেতিৰে উপাৰ্জন কৰিছে লক্ষাধিক টকা! নলবাৰীৰ উচ্চ শিক্ষিত যুৱক সঞ্জীৱৰ প্ৰচেষ্টাক শলাগ লৈছে সকলোৱে!

মকুটা বিচাৰি এতিয়া সাগৰ পাৰলৈ যাব নালাগে আপুনি! এইখন অসমতে সম্ভৱ মুকুটাৰ খেতি। মূল্যবান মুকুটা খেতি এতিয়া উপলব্ধ নলবাৰীত ।নলবাৰীৰ এগৰাকী উচ্চ শিক্ষিত যুৱকৰ প্ৰচেষ্টাত নিজৰ পুখুৰীত উৎপাদন কৰিছে মূল্যবান মুকুটা। বৈজ্ঞানিক পদ্ধতিত কৰিছে মুকুটা  খেতি। শামুকক বিশেষভাৱে অস্ত্ৰোপচাৰ কৰি এইগৰাকী উচ্চশিক্ষিত যুৱকে প্ৰস্তুত কৰি উলিয়াইছে মুকুটা।

উল্লেখযোগ্য যে, মুকুটা খেতিৰ বাবে ভিন্ন প্ৰান্তত প্ৰশিক্ষণ লৈ নিজৰ ঘৰৰ পিছফালৰ পুখুৰীত নলবাৰীৰ পকোৱাৰ সঞ্জীৱ দত্ত নামৰ যুৱকগৰাকীয়ে কৰি আহিছে মূল্যৱান মুকুটাৰ খেতি।সচৰাচৰ নৈ, বিল, জলাশয় আদিত পোৱা কাণখোলা শামুক আনি অস্ত্ৰোপচাৰ কৰি বিশেষভাৱে পুখুৰীত পোহাৰ পিছত প্ৰায় এবছৰ ভিতৰত সম্পূৰ্ণ হৈ উঠে এই মুকুটা।

লক্ষণীয় যে, অতি কম খৰছতে এটা শামুকৰ ভিতৰত পাব পাৰি চাৰিটাকৈ মুকুটা।যাৰ বজাৰ মূল্য যথেষ্ট। যথেষ্ট চাহিদা থকা এই মুকুটা খেতি প্ৰায় দুবছৰ ধৰি কৰি আহিছে নলবাৰীৰ উচ্চশিক্ষিত যুৱক সঞ্জীৱ দত্তই। আনহাতে বহিঃৰাষ্ট্ৰত যদিও মুকুটাৰ খেতিত যথেষ্ট আগবঢ়া কিন্তু ভাৰতবৰ্ষত কিছু কিছু ঠাইতহে মুকুটা খেতি কৰা দেখা যায়। বিশেষকৈ ৰাজস্থান,উৰিষ্যা অন্যতম।

আনহাতে অতি কম সংখ্যক লোকে কৰি আহিছে অসমত মুকুটাৰ খেতি। ইফালে প্ৰতিটো মুকুটাৰ বজাৰ মূল্য যথেষ্ট হোৱা বাবে কম পৰিমাণৰ খেতি কৰিও লাখ লাখ টকা উপাৰ্জন কৰি স্বাৱলম্বী হ'ব পাৰি। ইফালে নলবাৰীৰ  যুৱকগৰাকীৰ একক প্ৰচেষ্টাত এনেদৰে মুকুটাৰ খেতি কৰি লাভান্বিত হৈছে।

যিটো সময়ত একাংশ যুৱকে চৰকাৰী চাকৰিৰ পিছত দৌৰি সময় অতিবাহিত কৰিছে তেনে সময়তে যুৱ প্ৰজন্মক এই খেতিৰ প্ৰতি আগ্ৰহী হ'বলৈ অনুৰোধ নলবাৰীৰ সঞ্জীৱৰ।

(নলবাৰীৰ পৰা কৈলাশ ডেকাৰ প্ৰতিবেদন)