আৰক্ষীৰ পৰা বাছিবলৈ জাপ দিলে বিলত, পানীমেটেকাৰ মাজত আৰক্ষীয়ে বিচাৰি পালে চোৰক

নগাঁৱৰ মৰিকলং আৰক্ষী চকীৰ পৰা হেণ্ডকাফসহ পলায়ন কৰা এটা চোৰক আৰক্ষীয়ে পানীমেটেকাৰ মাজৰ পৰা উদ্ধাৰ কৰে। জানিব পৰা মতে, আজি দিনৰ প্ৰায় ২ বজাত নগাঁৱৰ মৰিকলং আৰক্ষী চকীৰ পৰা পলায়ন কৰে ইকবাল হুছেইন নামৰ এটা চোৰে।

মৰিকলং অঞ্চলত বিভিন্ন লোকৰ ঘৰৰ পৰা পানী তোলা মটৰ চুৰি কৰি গ্ৰেপ্তাৰ হোৱা ইকবালে আজি আবেলিৰ ভাগত শৌচাগাৰলৈ যোৱাৰ চলনাৰে হেণ্ডকাফসহ আৰক্ষীৰ ওচৰৰ পৰা পলায়ন কৰে।

পিছে পিছে কৰ্তব্যৰত আৰক্ষী জোৱানে ইকবালক খেদি যোৱাত ইকবালে আৰক্ষীৰ পৰা বাচিবলৈ আৰক্ষী চকীৰ সন্মুখৰ মৰিকলং বিলত জাপ দি পানীমেটেকাৰ মাজত আত্মগোপন কৰে। অৱশেষত প্ৰায় এঘণ্টা অভিযান চলাই পলাতক ইকবালক পুনৰ গ্ৰেপ্তাৰ কৰিবলৈ সক্ষম হয় মৰিকলং আৰক্ষী। ধৃত ইকবালৰ ঘৰ জুৰীয়াৰ দগাঁৱত বুলি জানিব পৰা গৈছে।