বিকিয়ে বিক্ৰী কৰিবলৈ আনিছিল ড্ৰাগছ! নগাঁও আৰক্ষীৰ জালত দুধৰ্ষ ড্ৰাগছ মাফিয়া, উদ্ধাৰ বুজন পৰিমাণৰ ড্ৰাগছ

নিষিদ্ধ ড্ৰাগছৰ বিৰুদ্ধে নগাঁও আৰক্ষীয়ে অব্যাহত ৰাখিছে অভিযান। এইবাৰ নগাঁৱৰ ধিং গেটৰ  ড্ৰাগছৰ মূল ব্যৱসায়ীজনকে আটক কৰিবলৈ সক্ষম হয় নগাঁও আৰক্ষী। শুকুৰবাৰে বিয়লি নগাঁৱৰ হয়বৰগাঁও আৰক্ষী চকীৰ ভাৰপ্ৰাপ্ত বিষয়া তৰংগ পাটোৱাৰীৰ নেতৃত্বত আৰক্ষীৰ এটা দলে গোপন সূত্ৰৰ তথ্যৰ ভিত্তিত চলোৱা অভিযানত জালত পেলাবলৈ সক্ষম হয় কুখ্যাত ড্ৰাগছ সৰবৰাহকাৰীজনক।

ধিং গেটৰ লগতে বিভিন্ন  প্ৰান্তলৈ ড্ৰাগছৰ যোগান ধৰা বিকি সূত্ৰধাৰ নামৰ ড্ৰাগছ সৰবৰাহকাৰীজনক আটক কৰাৰ লগতে বুজন পৰিমাণৰ নিষিদ্ধ ড্ৰাগছ জব্দ কৰিবলৈ সক্ষম হয়। বিকি সূত্ৰধৰৰ বাসগৃহত অভিযান চলাই আৰক্ষীৰ দলটোয় চিলিণ্ডাৰসহ বহু অপত্তিজনক সামগ্ৰী জব্দ কৰিবলৈ সক্ষম হয়। জব্দ কৰা সামগ্ৰীসমূহ চুৰি বুলি সন্দেহ প্ৰকাশ কৰিছে আৰক্ষীয়ে।

উল্লেখযোগ্য যে, ড্ৰাগছ সৰবৰাহকাৰী বিকি সূত্ৰধৰ আৰক্ষীৰ কবলৰ পৰা কেইবাবাৰো পলায়নৰ চেষ্টা কৰিছিল যদিও সফল হ'ব পৰা নাই। সম্প্ৰতি অধিক তথ্যৰ বাবে হয়বৰগাঁও আৰক্ষীয়ে জেৰা অব্যাহত ৰাখিছে ধৃত ড্ৰাগছ সৰবৰাহকাৰী বিকি সূত্ৰধাৰক।