নগাঁৱত ভয়াৱহ গতিত বৃদ্ধি পাইছে কোৰোণাৰ সংক্ৰমণ, ৰাইজৰ মাজত নাই সজাগতা

যিমানেই নগাঁৱত কোৰোণাৰ সংক্ৰমণ বৃদ্ধি পাইছে সিমানেই ৰাইজৰ মাজত নাইকীয়া হৈছে সজাগতা। নগাঁৱত যোৱা ১ এপ্ৰিলৰ পৰা বৰ্তমানলৈকে ১৮০জন লোক কোৰোণাত আক্ৰান্ত হৈছে যদিও পূৰ্বৰ তুলনাত ৰাইজৰ মাজত কোনোধৰণৰ সজাগতা পৰিলক্ষিত হোৱা নাই।

বিশেষকৈ চহৰখনৰ ভূঞাপট্টি, ধিং গেট আদি অঞ্চলত অধিকাংশ লোকেই মাস্ক পৰিধান নকৰাকৈ ঘূৰি ফুৰা পৰিলক্ষিত হৈছে। ইপিনে মাস্ক পৰিধান নকৰিলে চৰকাৰে ১হাজাৰ টকাৰ জৰিমনাৰ নিৰ্দেশনা জাৰি কৰিছে যদিও বৰ্তমানলৈকে নগাঁও জিলা প্ৰশাসনে এইক্ষেত্ৰত কোনোধৰণৰ কঠোৰতা প্ৰদৰ্শন কৰা নাই।

বিগত বৰ্ষটিত নগাঁও জিলাত কোৰোণাৰ সংক্ৰমণে ভয়াৱহ ৰূপ ধাৰণ কৰিছিল। অসমৰ আটাইতকৈ অধিক কোৰোণা সংক্ৰমিত জিলাসমূহৰ ভিতৰত নগাঁও জিলা আছিল অন্যতম। নগাঁও জিলাৰ সংখ্যালঘূ অধ্যূষিত অঞ্চলসমূহত কোৰোণাৰ সংক্ৰমণ আছিল সৰ্বাধিক। সেইসময়তো সংখ্যালঘূ অধ্যূষিত অঞ্চলসমূহত ক'ৰোণাৰ সংক্ৰমণৰ মূলতে আছিল অসাৱধনতা। এইবেলিও ৰাইজৰ মাজত কোৰোণাক লৈ কোনোধৰণৰ সজাগতা পৰিলক্ষিত নোহোৱা ঘটনাই নগাঁৱত ভয়াৱহ পৰিস্থিতিৰ আগজাননী দিছে।

আনহাতে, সামাজিক মাধ্যমতো কোৰোণাক লৈ সাৱধানতা অৱলম্বন নকৰিবলৈ আৰু কোৰোণাৰ বিষয়ে ভুৱা প্ৰচাৰ  চলাই একাংশ দুষ্টচক্ৰই বিভ্ৰান্ত কৰিছে ৰাইজক। কোৰোণা চৰকাৰৰ অপপ্ৰচাৰ বুলি কৈ ৰাইজক সাৱধানতা অৱলম্বন কৰাৰ পৰা বিৰত থাকিবলৈ উচতনি দিয়া ফেচবুক একাউণ্টৰ বিৰুদ্ধেও প্ৰশাসনক কঠোৰ হোৱাৰ আহ্বান জনাইছে নগাঁৱৰ সাধাৰণ ৰাইজে।