'মোৰ ল'ৰাটোক এবাৰ পঠিয়াই দিয়ক, সি জীয়াই আছেনে নাই নাজানো, নাই যদিও কৈ দিয়ক’ – পৰেশ বৰুৱালৈ এগৰাকী মাতৃৰ আহ্বান

২০১১ চনতে স্বাধীন অসমৰ সপোন লৈ আলফা স্বাধীনলৈ নিজ ঘৰখন এৰি হঠাৎ এদিন গুচি গৈছিল ভাইটি তথা ভাস্কৰ গগৈ ওৰফে আলফা স্বাধীনৰ ছাৰ্জেন্ট অস্তিত্ব অসম। চাবুৱাৰ পৰেশ বৰুৱাৰ গৃহ গাঁও জেৰাই গাঁৱৰ সমীপৰ ৰজাবাৰীৰ নিজ গৃহৰ পৰা আলফালৈ যোৱা ভাস্কৰৰ পিতৃ বৰ্তমান মধুমেহ আৰু দুৰাৰোগ্য কেঞ্চাৰত আক্ৰান্ত হৈ ডিব্ৰুগড়ৰ এখন ব্যক্তিগত চিকিৎসালয়ত চিকিৎসাধীন। ৭০ৰ উৰ্ধ্বৰ প্ৰাক্তন অসম আৰক্ষী পিতৃ দেৱেশ্বৰ গগৈ আৰু ইতিমধ্যে ৰোগাক্ৰান্ত বৃদ্ধা মাতৃয়ে ঘৰখনৰ একমাত্ৰ সন্তান ভাস্কৰ (ভাইটি)ক বিচাৰি চিকিৎসালয়তে টুকিছে চকুলো।

এতিয়া ৰোগাক্ৰান্ত বৃদ্ধা পিতৃয়ে এবাৰ চাব বিচাৰিছে নিজ পুত্ৰক। নিৰুপাই মাতৃৰ আলফাৰ সেনাধ্যক্ষ পৰেশ বৰুৱাক কাতৰ অনুৰোধ – 'মোৰ লৰাটোক এবাৰ পঠিয়াই দিয়ক, সি জীয়াই আছে নে নাই তাকো নাজানো। নাই যদিও কৈ দিয়ক। আপুনি জেৰাই গাঁৱৰ মই ৰাজাবাৰীৰ। ইমান দুখ হৈছে আপোনাৰ বেয়া নালাগিবনে। আমাৰ ল'ৰাটো ইমান দিনৰ পৰা নাই। মৃত্যুৰ সময়ত এবাৰ চাবলৈ দিয়ক।’

ইয়াৰ বাবে ভুল নুবুজিবলৈও আহ্বান জনায় মাতৃগৰাকীয়ে। আৰ্থিক দৈন্যতাৰ বাবে স্বামীৰ সু-চিকিৎসা কৰোৱাত সৃষ্টি হোৱা সমস্যাৰ বিষয়ে উল্লেখ কৰি 'আমাৰো দেশপ্ৰেম আছে’ বুলি কৈ নিজ সন্তানক এবাৰ ঘৰলৈ পঠিয়াই দিবলৈ বাৰে বাৰে অনুৰোধ জনাইছে পৰেশ বৰুৱাক।