‘১ লাখ, ২ লাখ বছৰৰ পিছতো বদৰুদ্দিন অসমৰ মুখ্যমন্ত্ৰী হ’ব নোৱাৰে’- শ্বেৰমান আলীক কংগ্ৰেছৰ পৰা বহিষ্কাৰৰ দাবী জনালে বিধায়ক ৰূপজ্যোতি কুৰ্মীয়ে

News18 Assam | News18-Assam
Updated:October 28, 2020, 6:54 PM IST
‘১ লাখ, ২ লাখ বছৰৰ পিছতো বদৰুদ্দিন অসমৰ মুখ্যমন্ত্ৰী হ’ব নোৱাৰে’- শ্বেৰমান আলীক কংগ্ৰেছৰ পৰা বহিষ্কাৰৰ দাবী জনালে বিধায়ক ৰূপজ্যোতি কুৰ্মীয়ে
চৰাইদেউ জিলা কংগ্ৰেছৰ তত্বাৱধায়ক হিচাপে নিযুক্তি লাভ কৰা ৰূপজ্যোতি কুৰ্মীয়ে আজি মাহমৰা সমষ্টিৰ প্ৰথমখন দলীয় সভাত অংশগ্ৰহণ কৰাৰ পিছতে সংবাদমেল সম্বোধন কৰে। 

চৰাইদেউ জিলা কংগ্ৰেছৰ তত্বাৱধায়ক হিচাপে নিযুক্তি লাভ কৰা ৰূপজ্যোতি কুৰ্মীয়ে আজি মাহমৰা সমষ্টিৰ প্ৰথমখন দলীয় সভাত অংশগ্ৰহণ কৰাৰ পিছতে সংবাদমেল সম্বোধন কৰে। 

  • Share this:
শ্ৰীমন্ত শংকৰদেৱ কলাক্ষেত্ৰত মিঞা সংগ্ৰহালয় স্থাপনৰ প্ৰস্তাৱক কেন্দ্ৰ কৰি ৰাজ্যৰ ৰাজনীতি উত্তাল হৈ থকাৰ সময়তে বিধায়ক শ্বেৰমান আলীক কংগ্ৰেছ দলৰ পৰা বহিষ্কাৰৰ দাবী জনাইছে কংগ্ৰেছৰে বিধায়ক ৰূপজ্যোতি কুৰ্মীয়ে ৷ বুধবাৰে মৰাণ নগৰস্থিত মাহমৰা ব্লক কংগ্ৰেছৰ কাৰ্যালয়ত অনুষ্ঠিত এক সংবাদমেলত শ্বেৰমান আলীৰ মন্তব্য কংগ্ৰেছ দলৰ মন্তব্য নহয় বুলিও স্পষ্ট কৰি দিয়ে ৰূপজ্যোতিয়ে ৷

বিধায়ক ৰূপজ্যোতি কুৰ্মীয়ে কয় যে, ‘গুৰুজনাৰ আদৰ্শৰ দ্বাৰা প্ৰতিষ্ঠিত শ্ৰীমন্ত শংকৰদেৱ কলাক্ষেত্ৰ ৷ ইয়াত কোনোধৰণৰ ৰাজনীতিকৰণ হোৱা উচিত নহয় ৷ বিধায়ক শ্বেৰমান আলীয়ে মিঞা সংগ্ৰহালয় স্থাপনৰ কথা কৈ ডাঙৰ ভুল কৰিছে ৷ শ্বেৰমান আলীক শীঘ্ৰে কংগ্ৰেছ দলৰ পৰা বহিস্কাৰ কৰিব লাগে ৷ লগতে বিষয়টো আলোচনাৰ বাবে যিখন ১৫ জনীয়া সমিতি গঠন কৰা হৈছিল তেওঁলোককো শাস্তি দিব লাগে ৷ শ্বেৰমান আলীৰ মূৰত কঁঠাল ভাঙি বিজেপিয়ে সুবিধা ল'ব বিচাৰিছে ৷’

চৰাইদেউ জিলা কংগ্ৰেছৰ তত্বাৱধায়ক হিচাপে নিযুক্তি লাভ কৰা ৰূপজ্যোতি কুৰ্মীয়ে আজি মাহমৰা সমষ্টিৰ প্ৰথমখন দলীয় সভাত অংশগ্ৰহণ কৰাৰ পিছতে সংবাদমেল সম্বোধন কৰে।  সংবাদমেলত মহাজোঁটবন্ধনৰ কথা উল্লেখ কৰি কংগ্ৰেছ দলে ২০২১ চনৰ নিৰ্বাচনত ৭০ খনৰ অধিক আসন লাভ কৰি চৰকাৰ গঠন কৰিব বুলি দাবী কৰে বিধায়ক ৰূপজ্যোতিয়ে ৷ অগপ-বিজেপি মিত্ৰজোঁটে কৈ থকাৰ দৰে বদৰুদ্দিন আজমল কেতিয়াও অসমৰ মুখ্যমন্ত্ৰী হ'ব নোৱাৰে বুলি উল্লেখ কৰা ৰূপজ্যোতিয়ে ১ লাখ, ২ লাখ বছৰলৈও আজমল মুখ্যমন্ত্ৰী হ'ব নোৱাৰে বুলি মন্তব্য কৰে ৷

আছুৰ সাধাৰণ সম্পাদক লুৰিণজ্যোতি গগৈক ভাল ল'ৰা বুলি অভিহিত কৰি দুলীয়াজানৰ পৰা জিকিব বুলি কয় ৰূপজ্যোতিয়ে ৷ অসমী আইৰ ৰক্ষাৰ স্বাৰ্থত অসম জাতীয় পৰিষদ, ৰাইজৰ দলকো কংগ্ৰেছৰ লগত চামিল হ'বলৈ আহ্বান জনাই ৰূপজ্যোতিয়ে ৷ নিৰ্বাচনত এজেপিয়ে ২ বা ৩ খন আসন, ৰাইজৰ দলে ৪ ৰ পৰা ৫ খন আসন লাভ কৰিব বুলি মন্তব্য কৰি দুয়োটা দলকে কংগ্ৰেছৰ সৈতে মহাজোঁটত চামিল হ'বলৈ আহ্বান জনাই কংগ্ৰেছৰ বিধায়কজনে ৷

মূল্যবৃদ্ধি ৰোধ, নিৱনুৱা সংস্থাপন, ছয় জনগোষ্ঠীৰ জনজাতিকৰণকে ধৰি বিজেপি চৰকাৰে দিয়া প্ৰতিশ্ৰুতিসমূহ এটাও পালন নকৰা বিজেপি চৰকাৰক মিছলীয়া, ঠগবাজ আখ্যা দি  ৰূপজ্যোতি কুৰ্মীয়ে কয় যে অসমৰ ৰাইজে বিজেপি দলৰ চৰিত্ৰ বুজি পাইছে আৰু এইবাৰ কংগ্ৰেছ দলকে সমৰ্থন জনাব ৷
Published by: Himangshu Bhuyan
First published: October 28, 2020, 6:45 PM IST
আৰু চাওক
পৰৱৰ্তী বাতৰি

শেহতীয়া বাতৰি

corona virus btn
corona virus btn
Loading