মাছ মৰাৰ আগত যেনেকৈ ছটফটাই বিজেপিৰ নেতাসকলেও এতিয়া তেনেকৈ ছটফটাইছে, মন্তব্য ৰূপজ্যোতি কুৰ্মীৰ

মাহমৰা সমষ্টিৰ লাকুৱাত বুধবাৰে লাকুৱা ব্লক কংগ্ৰেছৰ উদ্যোগত এক বৰ্ধিত কাৰ্যনিৰ্বাহক সভা অনুষ্ঠিত হয়৷ লাকুৱা সৃজনী প্ৰেক্ষাগৃহত অনুষ্ঠিত উক্ত সভাত মুখ্য অতিথি হিচাপে উপস্থিত থাকে মৰিয়নী সমষ্টিৰ বিধায়ক ৰূপজ্যোতি কুৰ্মী৷ সভাত উপস্থিত হৈ বিধায়কজনে  বিজেপি চৰকাৰখনে ৰাইজক শোষণ কৰি‌ আছে বুলি মন্তব্য প্ৰকাশ কৰে৷ এইখন চৰকাৰে সকলো লোককে ঠগি আছে আৰু সেই কাৰণেই বহু লোকে বিজেপি ত্যাগ কৰি কংগ্ৰেছ দললৈ ঢাপলি মেলিছে বুলি কয় কুৰ্মীয়ে৷ বিধায়কগৰাকীয়ে কয় যে বহু ৰাজনৈতিক দলে এতিয়া বিজেপি এৰিছে৷ গতিকে অহা ২১ চনৰ নিৰ্বাচনত কংগ্ৰেছ দলে ভাল ফলাফল দেখুৱাবলৈ সক্ষম হ’ব।

বিধায়ক শ্বেৰমান আলীক সমালোচনা কৰাৰ লগতে সেই সমিতিত থকা বিজেপিৰ বিধায়ক সকলকো সমালোচনা কৰে কুৰ্মীয়ে। শ্বেৰমান আলীক দলৰ পৰা বৰ্জন কৰিব লাগে বুলিও ৰূপজ্যোতি কুৰ্মীয়ে মত প্ৰকাশ কৰে। মহাজোঁটবন্ধন হ'লে AIUDF আৰু কংগ্ৰেছৰ মিত্ৰতা সমৰ্থন কৰিম, ইয়াৰ বাদে কেৱল AIUDF আৰু কংগ্ৰেছৰ মিত্ৰতা কেতিয়াও সমৰ্থন নকৰো বুলিও মন্তব্য কৰে বিধায়কজনে।

মোগলৰ কথা কোৱা বিজেপি নেতা–কৰ্মীক সমালোচনা কৰি ৰূপজ্যো কুৰ্মীয়ে কয়, ‘‘ভাৰতত এতিয়া মোগল নাই, আছে যদি বিদেশী আছে৷ মন্ত্ৰী হিমন্ত বিশ্ব শৰ্মাই আবোল–তাবোল বকিছে। মাছ মৰাৰ আগত যেনেকৈ ছটফটাই, তেনেকৈ বিজেপি দল শেষ হোৱাৰ প্ৰাক মুহূৰ্তত নেতা–কৰ্মীসকলে ছটফটাইছে৷’’