বিধানসভাত অধ্যক্ষৰ ওচৰত ক্ষমা খুজিলে ৰূপজ্যোতি কুৰ্মীয়ে, ক’লে – আপুনি আমাৰ অভিভাৱক, আপোনাক সন্মান কৰো

মঙলবাৰে অসম বিধানসভাৰ প্ৰশ্নকালীন ঘণ্টাত পইণ্ট অৱ অৰ্ডাৰ আনি হুলস্থূলীয়া পৰিৱেশ সূচনা কৰিছিল কংগ্ৰেছী বিধায়ক ৰূপজ্যোতি কুৰ্মীয়ে৷ এই বিষয়ত অধ্যক্ষ হিতেন্দ্ৰনাথ গোস্বামীয়ে বিধায়ক কুৰ্মীক বাধা দিছিল যদিও মানা নাছিল৷ হুলস্থূলীয়া পৰিৱেশ সৃষ্টি কৰাত সদন পৰিচালনা নিয়ম অনুসৰি এদিনৰ পৰা ৰূপজ্যোতি কুৰ্মীক সদনৰ পৰা বহিষ্কাৰ কৰিছিল৷ সদনৰ পৰা বহিষ্কৃত হৈ সদনৰ বাহিৰত  ৰূপজ্যোতি কুৰ্মীয়ে সংবাদ মাধ্যমৰ সন্মুখত অধ্যক্ষৰ বিৰুদ্ধে মন্তব্য কৰিছিল৷ অধ্যক্ষই পক্ষপাতিত্ব কৰা বুলি অভিযোগ কৰি কুৰ্মীয়ে টিকটৰ টনা-টনি হোৱাৰ বাবেই অধ্যক্ষই BJPৰ হৈ সদন পৰিচালনা কৰাৰ গুৰুতৰ অভিযোগ তোলে৷

এই বিষয়ত বুধবাৰে সদনত প্ৰশ্নকালীন ঘণ্টাৰ পিছত পইণ্ট অৱ অৰ্ডাৰ আনে BJPৰ বিধায়ক পদ্ম হাজৰিকাই৷ পদ্ম হাজৰিকাই ক'লে- “সদনৰ নিয়ম অনুসৰি সদন চলিব লাগে৷ প্ৰশ্নকালীন সময়ত কিয় পইণ্ট অৱ অৰ্ডাৰ আনি প্ৰশ্ন কৰিছিল কংগ্ৰেছৰ বিধায়কজনে৷ অধ্যক্ষই নিয়ম অনুসৰি বহিষ্কাৰ কৰিছিল৷ সংবাদ মাধ্যমত কিয় টিকটৰ টনা-টনি হোৱাৰ বাবে বিজেপিৰ হৈ অধ্যক্ষই সদন পৰিচালনা কৰা বুলি ক'লে ৰূপজ্যোতি কুৰ্মীয়ে৷ সদনৰ মৰ্যাদা অধ্যক্ষৰ মৰ্যাদা ৰক্ষা হ'লেহে হ'ব৷ সেয়ে বিধায়কজনে সদনত ক্ষমা খুজিব লাগে৷ নহ'লে সদন অৱমাননাৰ অভিযোগ আনিব লাগে৷”

বিধায়ক পদ্ম হাজৰিকাৰ এই প্ৰস্তাৱৰ সন্দৰ্ভত বিৰোধী দলপতি দেৱব্ৰত শইকীয়াই অধ্যক্ষক অনুৰোধ জনাই কয়, "ইমানতে বিষয়টো নিষ্পত্তি বিচাৰিছো৷ আগতেও এনে ঘটনা হৈছে সদনত৷ কালিৰ ঘটনাটোৰ বাবে আমি ক্ষমা বিচাৰিছো৷”

কিন্ত শাসকীয় পক্ষৰ সকলো বিধায়ক অধ্যক্ষৰ ওচৰত ৰূপজ্যোতি কুৰ্মীয়ে ক্ষমা বিচৰাৰ দাবী জনায়৷ এই প্ৰসংগত সংসদীয় পৰিক্ৰমা দপ্তৰৰ মন্ত্ৰী চন্দ্ৰমোহন পাটোৱাৰীয়ে ক'লে- “অধ্যক্ষৰ মৰ্যাদা থাকিলেহে সদনৰ মৰ্যাদা থাকিব৷ বহিষ্কাৰ কৰাৰ পিছত বিৰোধী দলপতিৰ অনুৰোধ আৰু মোৰ সন্মতিক্ৰমে ৰূপজ্যোতি কুৰ্মীক পুনৰ সদনত কালি প্ৰৱেশ কৰিব দিয়া হৈছিল৷ প্ৰৱেশ কৰিব দিয়াৰ পিছত পুনৰ ৰূপজ্যোতিয়ে বুকুত ঢকিয়াই ঢকিয়াই লাইকা-দধীয়াৰ কথা ক'লে৷ এনেদৰে কিয় ব্যৱহাৰ কৰিব তেওঁ৷ অধ্যক্ষৰ ওচৰত ক্ষমা খোজক ৰূপজ্যোতিয়ে৷ অধ্যক্ষই টিকট পাবনে নাপাব সেয়া BJPৰ ৰঞ্জিত দাস আৰু নাড্ডাই ঠিক কৰিব৷ সেয়া কিয় ক'ব ৰূপজ্যোতিয়ে৷ সেয়া তেওঁৰ এক্টিয়াৰৰ বিষয় নহয়৷ সদনৰ মৰ্যাদা হানি হৈছে৷ ক্ষমা খোজক নহ'লে প্ৰিভিলাইছ আনিব লাগে৷”

এই সন্দৰ্ভত অধ্যক্ষ হিতেন্দ্ৰনাথ গোস্বামীয়ে ক'লে- “ৰূপজ্যোতিক মই ভাইৰ দৰে মানো৷ আমি একে জিলাৰ৷ কিন্তু ৰূপজ্যোতিয়ে নিজে কথাবোৰ বুজিবলৈ চেষ্টা কৰক৷ ক'ত কি ক'ব লাগে৷ নিজক নিয়ন্ত্ৰণ কৰক৷ সদনৰ মৰ্যাদা ৰক্ষা কৰিব লাগে৷ ৰূপজ্যোতিয়ে নিজৰ বিবেকক সোধক এবাৰ৷ কি কৰিব লাগে নালাগে, বুজি কৰক৷ আমি যোৰ কৰি তেওঁক একো কৰাই লাভ নাই৷ তেওঁ নিজে বিবেচনা কৰি কৰক৷”

অধ্যক্ষই পুনৰ কয়- “ৰূপজ্যোতি কুৰ্মীয়ে কি ক'ব এটা বাক্যত কওক৷ তেওঁ মোৰ বিৰুদ্ধে ব্যক্তিগত মন্তব্য কৰাতোত তেওঁ অনুশোচনাত দগ্ধ হৈছেনে নাই৷ সেই কথা সদনক জনাওক৷”

সদনত উত্থাপিত আৰু চৰ্চিত বিষয়ত থিয় হৈ ৰূপজ্যোতি কুৰ্মীয়ে ক'লে- “অধ্যক্ষ মহোদয়, আপুনি আমাৰ অভিভাৱক৷ আমি বিৰোধী হিচাপে সকলোৰে দৃষ্টি আকৰ্ষণ কৰিব লাগিব৷ গাঁৱৰ মানুহে পিয়াজ নোখোৱা বুলি মন্তব্য কৰা মানুহে ক'লে বুলিয়েই মই কিন্তু একো নকওঁ৷ মই আপোনাক সন্মান কৰো৷ সেৱা কৰো৷ আপুনি উকিল আছিল, মই সৰুৰে পৰা সেৱা কৰি আহিছো আপোনাক৷ কালি ৰাজনৈতিকভাৱে কৰা মন্তব্যৰ বাবে মই ক্ষমা বিচাৰিছো৷”

ৰূপজ্যোতি কুৰ্মীয়ে সদনত অধ্যক্ষৰ ওচৰত ক্ষমা বিচৰাৰ পিছত কংগ্ৰেছী বিধায়ক শ্বেৰমান আলী আহমেদে এই বিষয়ত এক গুৰুত্বপূৰ্ণ মন্তব্য কৰে৷ বিধায়ক শ্বেৰমানে ক'লে- “অধ্যক্ষ তেতিয়াহে নিৰ্ভয়ে কাম কৰিব পাৰিব; যদিহে অধ্যক্ষৰ বিৰুদ্ধে পৰৱৰ্তী নিৰ্বাচনত কোনো দলে প্ৰাৰ্থী নিদিয়ে৷ এই বিষয়টো আমি সকলো দলে বহি আলোচনা কৰিব লাগে৷ এটা সময়ত লোকসভাতো এই বিষয়ত আলোচনা হৈছিল৷ সদনৰ মৰ্যাদা ৰক্ষা কৰিবলৈ অধ্যক্ষই নিৰপেক্ষ হ'বলৈ চেষ্টা কৰে৷ কিন্ত তেওঁতো এটা ৰাজনৈতিক দলৰ পৰাহে আহে৷ সেয়ে বিষয়টো আলোচনা কৰিব লাগে৷”