বিধানসভাৰ গ্ৰীষ্মকালীন অধিৱেশনৰ পূৰ্বে এতিয়া কোৰোণাত আক্ৰান্ত ইজনৰ পিছত সিজন বিধায়ক

৩১ আগষ্টৰ পৰা অসম বিধান সভাৰ গ্ৰীষ্মকালীন অধিৱেশন। কিন্তু অধিৱেশন আৰম্ভ হোৱাৰ পূৰ্বে এতিয়া কোৰোণাত আক্ৰান্ত হৈছে ইজনৰ পিছত সিজন বিধায়ক। এইবাৰ কোৰোণাত আক্ৰান্ত হ’ল বৰাক উপত্যকাৰ আলগাপুৰ বিধান সভা সমষ্টিৰ এআইইউডিএফৰ বিধায়ক নিজামুদ্দিন চৌধুৰী। আনকি বিধায়কজনৰ পত্নী আৰু সন্তানৰ দেহতো কোৰোণা পোৱা গৈছে।

পূৰ্বে ৰাজ্যৰ কেইবাজনো বিজেপি বিধায়ক ক্ৰমে পাথাৰকান্দিৰ সমষ্টিৰ বিধায়ক কৃষ্ণেন্দু পাল, বৰক্ষেত্ৰী সমষ্টিৰ বিধায়ক নাৰায়ণ ডেকা, শদিয়া সমষ্টিৰ বিধায়ক বলিন চেতিয়া, সোনাৰী সমষ্টিৰ বিধায়িকা নৱনীতা সন্দিকৈ, দিছপুৰ সমষ্টিৰ বিধায়ক অতুল বৰা, চামগুৰি সমষ্টিৰ বিধায়ক ৰকিবুল হুছেইন আৰু সোনাই সমষ্টিৰ বিধায়ক তথা অসম বিধান সভাৰ উপাধাক্ষ আমিনুল হক লস্কৰো আক্ৰান্ত হৈছিল কোভিড ১৯ত।

শেহতীয়া ভাৱে অসম বিধান সভা সচিবালয়ৰ দহ জনতকৈ অধিক কৰ্মচাৰীৰ দেহতো কোৰোণাৰ অৱস্থিতি ধৰা পৰিছে। সেয়েহে জনপ্ৰতিনিধি আৰু বিধান সভা সচিবালয়ৰ কৰ্মচাৰী কোৰোণাত আক্ৰান্ত হোৱাৰ খবৰে অধিক চিন্তিত কৰিছে বিধান সভা কৰ্তৃপক্ষক।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।