‘পাকিস্তান জিন্দাবাদ’ দিয়াসকলক অসমত থাকিবলৈ দিয়া নহ’ব, ব্ৰহ্মপুত্ৰত দলিয়াই দিয়া হ’ব – হুংকাৰ বিজেপি বিধায়কৰ

শিলচৰত আজমলৰ সমৰ্থকে ‘পাকিস্তান জিন্দাবাদ’ ধ্বনি দিয়া বুলি অভিযোগ উঠা ঘটনাই ৰাজ্যৰ ৰাজনীতিত তোলপাৰ লগাইছে। বিজেপিয়ে বিতৰ্কিত ভিডিঅ’ক লৈ পানী ঘোলা কৰিছে৷ উক্ত বিতৰ্কিত ভিডিঅ’ প্ৰভাৱশালী মন্ত্ৰী ড০ হিমন্ত বিশ্ব শৰ্মাই ছচিয়েল মিডিয়াত আপলোড দিয়াৰ পিছতেই কৰ্তৃপক্ষই উক্ত ভিডিঅ’ ভুৱা বুলি উল্লেখ কৰি আঁতৰাই দিলে৷ ইয়াকে লৈ তীব্ৰ প্ৰতিক্ৰিয়াৰ সৃষ্টি হৈছে৷

কিন্তু বিজেপি বিধায়কে যেন মানিব নোখোজে এই কথা। মন্ত্ৰী হিমন্ত বিশ্বৰ পক্ষত থিয় দি ‘পাকিস্তান জিন্দাবাদ’ ধ্বনি প্ৰসংগত ঢেকিয়াজুলিৰ বিজেপি বিধায়ক অশোক সিংঘালৰ মন্তব্য- ‘পাকিস্তান জিন্দাবাদ’ ধ্বনি দিয়া ভিডিঅ’টো সঁচা নে মিছা ফেচবুকে ভেৰিফাই কৰিব লাগিব নেকি? এইবিলাক কিহৰ তদন্ত হ’ব লাগে? ৰাইজে কৈছে তাত ‘পাকিস্তান জিন্দাবাদ’ ধ্বনি দিয়া হৈছিল বুলি, তাৰ মানে কৈছে৷

‘‘পাকিস্তান জিন্দাবাদ’ দিয়া কোনো লোকেই অসমৰ মাটিত থাকিব নোৱাৰে৷ যদি ‘ভাৰত মাত কী জয় কয় তেন্তে ঠিক আছে, কিন্তু ‘পাকিস্তান জিন্দাবাদ’ দিয়াসকল অসমৰ পৰা যাব লাগিব৷ এক্সন নহয় ব্ৰহ্মপুত্ৰত দলিয়াই দিয়া হ’ব ‘পাকিস্তান জিন্দাবাদ’ দিয়া সকলক৷’ – ক’লে অশোক সিংঘালে।

উল্লেখযোগ্য যে ঢেকিয়াজুলিত দেওবাৰে বিজেপিৰ যোগদান সভা অনুষ্ঠিত হয়৷ উক্ত যোগদান সভাত বিধায়ক অশোক সিংঘালৰ উপস্থিতি কংগ্ৰেছ, অগপ আদি দলৰ নেতা–কৰ্মীয়ে দল ত্যাগ কৰি বিজেপি দলত যোগদান কৰে৷ পুনৰ ঢেকিয়াজুলি দখলৰ বাবে কুচকাৱাজ আৰম্ভ কৰা ঢেকিয়াজুলিৰ বিজেপি বিধায়ক সিংঘালে উক্ত সভাত কংগ্ৰেছক সমালোচনা কটাক্ষ কৰি কয়, ‘কংগ্ৰেছত এতিয়া অমাৱস্যা চলি আছে, বিজেপিত পূৰ্ণিমা চলি আছে৷ পূৰ্ণিমাৰ পোহৰ লাগিলে বিজেপিৰ লগত থাকিব লাগিব৷ অমাৱস্যাত থাকিলে অন্ধকাৰেই অন্ধকাৰ৷’