‘একাংশ সাংবাদিকে বিকৃত কৰিলে মোৰ ভাষ্য, সৰ্বানন্দ সোণোৱাল মুখ্যমন্ত্ৰী হৈ থকা সময়ত অসমত দ্বিতীয়জনৰ চিন্তাৰ কথাই নাহে’

‘ড° হিমন্ত বিশ্ব শৰ্মা মুখ্যমন্ত্ৰীৰ বাবে যোগ্য হয়নে নহয় বুলি সোধা প্ৰশ্নৰ উত্তৰতহে আমি কৈছিলো তেওঁ সম্পূৰ্ণ যোগ্য বুলি। কিন্তু সৰ্বানন্দ সোণোৱাল মুখ্যমন্ত্ৰী হৈ থকা সময়ত দ্বিতীয়জনৰ কথা অহাই নাই। এয়া একাংশ সংবাদ মাধ্যম তথা সাংবাদিকহে ৰহণ সানি মোৰ ভাষ্যক বিকৃত ৰূপত উপস্থাপন কৰিছে।" শনিবাৰে নগাঁৱত সাংবাদিকৰ সন্মুখত এই মন্তব্য কৰে মন্ত্ৰী পীয়ুষ হাজৰিকাই।

৭৪সংখ্যক স্বাধীনতা দিৱস উপলক্ষে নগাঁৱৰ নুৰুল আমিন ষ্টেডিয়ামত মুখ্য অতিথি হিচাপে অংশগ্ৰহণ কৰা মন্ত্ৰীগৰাকীক সংগ দিয়ে তেওঁৰ পত্নী তথা জনপ্ৰিয় অভিনেত্ৰী আইমী বৰুৱাই। স্বাধীনতা দিৱসত অংশগ্ৰহণ কৰাৰ পিছতে নগাঁও আৱৰ্ত ভৱনত সাংবাদিকৰ সৈতে হোৱা কথা বতৰাত মন্ত্ৰীগৰাকীয়ে তেওঁৰ ভাষ্য সাংবাদিকেহে ৰহণ সানি প্ৰচাৰ কৰা বুলি অভিযোগ কৰে।

উল্লেখযোগ্য যে, শুকুৰবাৰে তেজপুৰত মন্ত্ৰীগৰাকীয়ে কৈছিল যে, ‘মোৰ ক্লীয়াৰ কাট কথা, হিমন্ত বিশ্ব শৰ্মা মুখ্যমন্ত্ৰী হোৱাৰ সম্পূৰ্ণযোগ্য। যোৱা ২০ বছৰে তেওঁ অতি সফল মন্ত্ৰী। অসমৰ পৰৱৰ্তী মুখ্যমন্ত্ৰী কোন হ’ব সেয়া দল আৰু নিৰ্বাচিত বিধায়কে নিৰ্ধাৰণ কৰি‍ব।’

মন্ত্ৰী পিয়ুষ হাজৰিকাৰ এই মন্তব্যৰ পিছতে সমগ্ৰ ৰাজ্যৰ ৰাজনীতি তীব্ৰ বিতৰ্কৰ সৃষ্টি হৈছিল। বিজেপিতো কংগ্ৰেছৰ দৰে মুখ্যমন্ত্ৰী ভঙা-পতাৰ ৰাজনীতি আৰম্ভ হৈছে বুলিও এচাম ৰাজনৈতিক বিশেষজ্ঞই মত পোষণ কৰিছিল।