‘এইবাৰ কংগ্ৰেছী বিধায়কৰ ঘৰৰ মানুহেই ভোট দিব বিজেপিক’

২০২১ত ৰাজ্যত হ’বলগীয়া বিধানসভা নিৰ্বাচনৰ বাবে এতিয়া তত্‍পৰ হৈ পৰিছে শাসক-বিৰোধী। প্ৰতিটো দলেই আৰম্ভ কৰিছে নিৰ্বাচনী ৰণকৌশল। তাৰ মাজতে চৰ্চালৈ আহিছে কংগ্ৰেছ আৰু AIUDFৰ প্ৰাক নিৰ্বাচনী মিত্ৰতাৰ প্ৰসংগ। এইবাৰ মিত্ৰতাৰ প্ৰসংগত মুখ খুলিছে মন্ত্ৰী পীয়ুষ হাজৰিকাই।

মন্ত্ৰী পীয়ুষ হাজৰিকাই কয় যে, ‘কংগ্ৰেছ আৰু AIUDFৰ মহাজোঁটবন্ধনলৈ অলপো শংকিত হোৱা নাই বিজেপি ৷ কিন্তু এটাই বেয়া লাগিছে যে, এই জোঁটবন্ধনে অসমৰ স্বাভিমানক আঘাত হানিব ৷ হু ইজ বদৰুদ্দিনৰ বুলি কোৱাৰ বাবেই কংগ্ৰেছক ভোট দি আছিল বহুতে ৷ এই মিত্ৰজোঁটৰ বাবেই আগন্তুক নিৰ্বাচনত হাৰিব উজনিৰ বহু কংগ্ৰেছী বিধায়ক ৷ বহু কংগ্ৰেছী বিধায়কক ঘৰৰ মানুহেই এইবাৰ বিজেপিক ভোট দিব।’

দেওবাৰে জাগীৰোড নগৰ পৰিদৰ্শন কৰি মন্ত্ৰীগৰাকীয়ে লগতে কয় যে, দুয়োটা দলৰ মিত্ৰজোঁটে বিজেপিক সহায়হে কৰিব ৷ ২০২১ৰ নিৰ্বাচনত পুনৰ বিজেপি ক্ষমতালৈ আহিব।’

আনহাতে পৰিস্থিতি নিয়ন্ত্ৰণৰ বাবে কোভিড প্ৰট’কল নমনা ব্যক্তিৰ বিৰুদ্ধে আৰক্ষীক কঠোৰ ব্যৱস্থা ল’বলৈ আহ্বান জনাই মন্ত্ৰীগৰাকীয়ে। ইফালে ৰাজ্যত কোৰোণাত আক্ৰান্তৰ সংখ্যা ক্ৰমাত্‍ বৃদ্ধি পাইছে যদিও, পৰিস্থিতিৰ সৈতে মোকাবিলা কৰিবলৈ ৰাজ্য চৰকাৰ সম্পূৰ্ণ সাজু বুলি মন্তব্য কৰে মন্ত্ৰীগৰাকীয়ে।

সংবাদ মাধ্যমত প্ৰচাৰ হোৱাৰ দৰে ৰাজ্যৰ কোভিড চিকিৎসালয় সমূহত বিচনাৰ অভাৱ হোৱা নাই বুলিও জানিবলৈ দিয়ে জাগীৰোডৰ বিধায়ক তথা ৰাজ্যিক স্বাস্থ্যমন্ত্ৰী পীয়ুষ হাজৰিকাই ৷