Pijush Hazarika: “আজিৰ ভিতৰতে তালিকা দিয়ক”, বানত ক্ষতিগ্ৰস্ত মথাউৰিৰ সমষ্টি ভিত্তিত তালিকা বিচাৰিলে জলসম্পদ মন্ত্ৰীয়ে

জলসম্পদ মন্ত্ৰী পীযুষ হাজৰিকা (Pijush Hazarika)ই আজি দিছপুৰৰ জনতা ভৱনৰ নিজ কাৰ্যালয়ৰ সভাকক্ষত বিভাগটোৰ উচ্চ পদস্থ বিষয়াসকলৰ লগত ৰাজ্যখনত শেহতীয়াকৈ হোৱা বানপানী (Assam Flood)ৰ বিষয়ত এক পৰ্যালোচনা বৈঠকত মিলিত হয় ৷ প্ৰথমতে মন্ত্ৰী হাজৰিকাই বিভাগৰ মুখ্য অভিযন্তা আৰু আন বিষয়াৰ পৰা শেহতীয়াকৈ বানত ক্ষতিগ্ৰস্ত হোৱা সমষ্টিসমূহৰ বিষয়ে বিষদভাৱে খতিয়ান লয় ৷

বানত ক্ষতিগ্ৰস্ত অঞ্চলসমূহত মথাউৰি (Embankment) নিৰ্মাণৰ বিষয়ে আলোচনা কৰি মন্ত্ৰী হাজৰিকাই বিভাগীয় অভিযন্তাৰ পৰা আজিৰ ভিতৰতে সমষ্টি অনুসৰি ক্ষতি হোৱা অথবা নিৰ্মাণৰ প্ৰয়োজন হোৱা মথাউৰিৰ তালিকা প্ৰস্তুত কৰিবলৈ নিৰ্দেশ দিয়ে ৷ হোজাই, ৰঙিয়া, বৰহমপুৰ, তামুলপুৰ, কমলপুৰ, ছিপাঝাৰ, নলবাৰি, বজালি, বৰমা, পাটাচাৰকুচী, ভৱানীপুৰ, যমুনামূখ, নগাঁও, বৰক্ষেত্ৰী, হাজো আদিকে ধৰি মধ্য আৰু নামনি অসমৰ লগতে বৰাক উপত্যকা (Barak Valley)ৰ বানত ক্ষতিগ্ৰস্ত অঞ্চলৰ মথাউৰিৰ সবিশেষ বিভাগক দিনটোৰ ভিতৰতে সাজু কৰি মন্ত্ৰীগৰাকীক জনাবৰ বাবে তেঁও নিৰ্দেশ দিয়ে ৷

আনহাতে মথাউৰিসমূহৰ সুৰক্ষাৰ বাবে প্ৰতি ৫ অথবা ৬ কিল’মিটাৰৰ অন্তত মথাউৰিসমূহত শ্লুইছ গেট বনোৱাৰ কথাটো প্ৰযুক্তিগতভাৱে অধ্যয়ন কৰিবৰ বাবেও মন্ত্ৰী হাজৰিকাই বিভাগীয় অভিযন্তাক আহ্বান জনায় ৷

আজিৰ পৰ্যালোচনা বৈঠকতে মন্ত্ৰীগৰাকীয়ে লোক নিৰ্মাণ বিভাগ আৰু জলসম্পদ বিভাগ (Water Resource Department)ৰ যুটীয়া উদ্যোগত নিৰ্মাণ হ’ব লগা পকী মথাউৰি তথা পথৰ অগ্ৰগতিৰ বিষয়েও বিভাগীয় বিষয়াৰ পৰা বুজ লয় ৷ বৈঠকত ৰাতাবাৰী সমষ্টিৰ বিধায়ক বিজয় মালাকাৰ, লোক নিৰ্মাণ পথ বিভাগৰ বিশেষ কৰ্তব্যৰত বিষয়া, জলসম্পদ বিভাগৰ মুখ্য অভিযন্তাৰ লগতে আন বিষয়াসকল উপস্থিত আছিল ৷