‘বিয়া পাতিবলৈহে আছু ত্যাগ কৰিছে লুৰিণ জ্যোতি গগৈয়ে’- কটাক্ষ মন্ত্ৰী পীযূষ হাজৰিকাৰ

ঘোষণা হ’ল তিৱা স্বায়ত্ত পৰিষদীয় নিৰ্বাচনৰ দিন ৷ নিৰ্বাচন আয়োগে ১৭ ডিচেম্বৰত পৰিষদীয় নিৰ্বাচনৰ দিন ঘোষণাৰ পিছতে তৎপৰ হৈ পৰিছে শাসকীয় বিজেপিৰ লগতে বিৰোধী দল কংগ্ৰেছ ৷ দেওবাৰে জাগীৰোডৰ উত্তৰ ধৰমতুলত অনুষ্ঠিত ভাৰতীয় জনতা পাৰ্টিৰ এখন ৰাজহুৱা সভাত আগন্তুক তিৱা স্বায়ত্ত পৰিষদৰ নিৰ্বাচনৰ ৰণডংকা বজাই বিধায়ক তথা অসম চৰকাৰৰ মন্ত্ৰী পীযূষ হাজৰিকাই ৷

সভাত সদ্য পদত্যাগী আছুৰ সাধাৰণ সম্পাদক লুৰিণজ্যোতিৰ বিৰুদ্ধে তীৰ্যক মন্তব্য মন্ত্ৰী পীযূষ হাজৰিকাৰ ৷ “বিয়া পাতিবলৈহে আছুৰ পৰা পদত্যাগ কৰিছে লুৰিণজ্যোতি গগৈয়ে ৷ ৰাজনীতিত কি প্ৰভাৱ পেলাব সেয়া এবছৰৰ পিছতহে গম পোৱা যাব বুলি তীৰ্যক মন্তব্য কৰে মন্ত্ৰী পীযূষ হাজৰিকাই ৷

ইফালে সভাৰ অন্তত সাংবাদিকৰে হোৱা বাৰ্তালাপত মন্ত্ৰীগৰাকীয়ে সাহিত্যিক তথা সততে বিজেপিক সমালোচনা কৰি সংবাদ শিৰোনাম দখল কৰা শিখা শৰ্মাকো সমালোচনা কৰে ৷ এআইইউডিএফ আৰু বদৰুদ্দিন আজমলক সমৰ্থন তথা বৰপীৰা পাৰি দিব খোজা শিখা শৰ্মাক জাতিদ্ৰোহী আৰু অসমৰ প্ৰকৃত বদন আখ্যা দিয়ে মন্ত্ৰীগৰাকীয়ে ৷

ইফালে বদৰুদ্দিন আজমল মুখ্যমন্ত্ৰী নহয় যদিও গৃহমন্ত্ৰী হোৱাৰ সপোন দেখিছে বুলিও ভাষণ প্ৰসংগত মন্তব্য কৰে ৷ উল্লেখ্য যে, আগন্তুক তিৱা স্বায়ত্ত পৰিষদৰ নিৰ্বাচনত জাগীৰোড সমষ্টিৰ অন্তৰ্গত সাতটা পৰিষদীয় সমষ্টিত বিজেপি প্ৰাৰ্থী জয়ী হ’ব বুলি সদম্ভ ঘোষণা কৰে অসম চৰকাৰৰ ৰাজ্যিক মন্ত্ৰীগৰাকীয়ে ৷