‘প্ৰতিদিনে ঘোষণা কৰিম নতুন আঁচনি, ২১ত আমাৰেই হ’ব চৰকাৰ, ৰিপুণ বৰাৰ শুকান মুখেই কয় কংগ্ৰেছৰ দুৰবস্থাৰ কথা’

যিমানেই ২১ৰ বিধানসভা নিৰ্বাচনৰ দিন চমু চাপিছে, সিমানে বৃদ্ধি পাইছে নেতাৰ মুখ চুপতি। এইবাৰ প্ৰদেশ কংগ্ৰেছৰ সভাপতি ৰিপুণ বৰাক উভতি ধৰিলে ৰাজ্যিক স্বাস্থ্যমন্ত্ৰী পীয়ুষ হাজৰিকা আৰু সাংসদ পল্লৱ লোচন দাসে।

ৰিপুণ বৰাক আক্ৰমণৰ লক্ষ্য কৰি পীয়ুষ হাজৰিকাই কয় যে, ‘ৰিপুণ বৰাৰ শুকান মুখখনেই কয় কংগ্ৰেছৰ  দুৰবস্থাৰ কথা ৷ কংগ্ৰেছৰ মানুহেই ৰিপুণ বৰাক বিশ্বাস নকৰে ৷ ৰিপুণ বৰা হতাশগ্ৰস্ত ব্যক্তি ৷ আবোল-তাবোল কথা কৈ ৰিপুণ বৰা এদিন নোহোৱা হৈ যাব ৷ কিয়নো আমি সপ্তাহত নহয় প্ৰতিদিনে আঁচনি ঘোষণা কৰিম আৰু সেই আঁচনি ৰূপায়নো কৰিম ৷ আগন্তুক ২১ত আমিয়েই চৰকাৰ গঠন কৰিম ৷’



একেদৰে ৰিপুণ বৰাৰ মন্তব্য সন্দৰ্ভত সাংসদ পল্লৱ লোচন দাসে সাংবাদিকৰ আগত নিজৰ প্ৰতিক্ৰিয়া ব্যক্ত কৰি কয় যে, ‘মন্ত্ৰী হিমন্ত বিশ্ব শৰ্মাই কোৰোণাৰ এই ভয়াৱহ দিনটো আঁচনি ৰূপায়নৰ কাম হাতত লৈছে ৷ যি আঁচনিয়ে কংগ্ৰেছক নিঃশেষ কৰি পেলাব ৷ যিবোৰ দেখি কংগ্ৰেছ শংকিত হৈছে ৷ এতিয়া কংগ্ৰেছীয়েই ৰিপুণ বৰাক বিশ্বাস নকৰে ৷ ৰিপুন বৰাৰ কথা বতৰা আৰু মুখখন দেখিলেই গম পোৱা যায় তেখেত সকল কিমান শংকিত ৷’

উল্লেখ্য যে. শুকুৰবাৰে তেজপুৰ চিকিৎসা মহাবিদ্যালয়ত ভাৰতীয় জনতা পাৰ্টিৰ উদ্যোগত অনুষ্ঠিত হোৱা প্লাজমা দান কাৰ্যসূচীত মন্ত্ৰী পীয়ুষ হাজৰিকা আৰু সাংসদ পল্লৱ লোচন দাস উপস্থিত আছিল৷