‘গ্ৰামোন্নয়ন বিভাগ ফেইল, সকলো মুখ্যমন্ত্ৰীক অৱগত কৰিম’-মন্ত্ৰী নৱ দলে আৰু বিধায়ক শিলাদিত্য দেৱৰ মাজত সংঘাত তুংগত

ক্ৰমাত্‍ দুৰত্ব বৃদ্ধি পাইছে বিধায়ক শিলাদিত্য দেৱ আৰু গ্ৰামোন্নয়ন মন্ত্ৰী নৱ কুমাৰ দলেৰ মাজত। বৃহস্পতিবাৰে মন্ত্ৰী নৱ দলেৰ উপস্থিতি হোজাইত অনুষ্ঠিত হোৱা গ্ৰামোন্নয়ন বিভাগৰ পৰ্যালোচনা সভালৈ নামাতিলে স্থানীয় বিধায়ক শিলাদিত্য দেৱক। যাৰফলত এতিয়া মন্ত্ৰীৰ বিৰুদ্ধে তীব্ৰ অসন্তুষ্টি ব্যক্ত কৰিছে বিধায়ক শিলাদিত্যই। আনকি ৰাজহুৱাকৈ বিধায়কজনে গ্ৰামোন্নয়ন বিভাগ সম্পূৰ্ণ ফেইল বুলিও মন্তব্য কৰে। এতিয়া সমগ্ৰ বিষয় মুখ্যমন্ত্ৰীক অৱগত কৰিম বুলি কয়, একপ্ৰকাৰ মন্ত্ৰী নৱ কুমাৰ দলেক চেলেঞ্জ দিলে বিধায়ক জনে।

বিজেপিৰ বিতৰ্কিত বিধায়ক শিলাদিত্য দেৱে কয় যে, ‘হোজাইত গ্ৰামোন্নয়ন বিভাগত সৰ্বাধিক দুৰ্নীতি হৈছে। এখন আঁচনি চাৰিবাৰকৈ ধৰা হৈছে কিন্তু এচপৰাও মাটি পৰা নাই। কাম নকৰাকৈ জবকাৰ্ডৰ টকা পাইছে। এয়া কি দুৰ্নীতি নহয় নেকি? ইয়াৰ উচিত তদন্ত হ’ব নালাগে নেকি?এই দুৰ্নীতি বোৰ মন্ত্ৰী ওচৰত উত্থাপন কৰিম বুলি ভাবিছিলো যদিও মোক নামাতিলে। মোক মন্ত্ৰীয়ে ফোন কৰা নাই মইহে কৰিছিলো। সভাত যদি নামাতে আমি ক’ত কম এই দুৰ্নীতিবোৰৰ বিষয়ে?

বিধায়ক শিলাদিত্যই লগতে কয় যে,‘সমগ্ৰ বিষয়টো মুখ্যমন্ত্ৰীক অৱগত কৰিম। গ্ৰামোন্নয়ন বিভাগ সম্পূৰ্ণ ফেইল। হোজাইত চলা দুৰ্নীতি সন্দৰ্ভত মন্ত্ৰীয়ে হয়তো গমেই নাপায়।গুৱাহাটীৰ পৰা ফোন কৰি হোজাই চলাব বিচাৰিছে।’

ট্ৰাক ধৰিলে এৰিবলৈ গুৱাহাটীৰ পৰা ফোন কৰা সংগঠনৰ নেতাক ফাদিল কৰি দিম বুলিও সকীয়নি শিলাদিত্য দেৱৰ। এতিয়া সহ্য নহয় প্ৰতিবাদ কৰিম। খাটি বিজেপিৰ মানুহ পইচাৰ লালসাত দুৰ্নীতিত লিপ্ত হৈছে। কান্ধত বেগ লোৱা মানুহে সংঘটিত কৰিছে দুৰ্নীতি। টিকট কটা আৰু দিয়া কৰে এইবিলাক নেতাই। এনেদৰে কয় বিধায়কজনে।