ৰাজ্যৰ পৰিৱেশ খুবেই বেয়া, ভেকচিন নহালৈ বৃহৎ প্ৰত্যাহ্বান, ক’লে মন্ত্ৰী হিমন্ত বিশ্ব শৰ্মাই

ৰাজ্যৰ পৰিৱেশ খুবেই বেয়া। এই মন্তব্য স্বাস্থ্য মন্ত্ৰী হিমন্ত বিশ্ব শৰ্মাৰ। আজি জি এম চি এইচৰ কোৰোণা আক্ৰান্ত ৰোগীসকলৰ স্বাস্থ্যৰ বুজ লয় মন্ত্ৰীগৰাকীয়ে। আই চি ইউ কক্ষৰ লগতে কেইবাজনো কোৰোণা ৰোগীৰ সৈতে বাৰ্তালাপ কৰে স্বাস্থ্য মন্ত্ৰী ড০ শৰ্মাই।

সংবাদ মাধ্যমৰ আগত হিমন্ত বিশ্ব শৰ্মাই কয় যে জি এম চি এইচত বেছিভাগ ৰোগী আই চি ইউত আছে। ৫০জন ৰোগী এতিয়া জি এম চি এইচৰ ছুপাৰ স্পেচিয়েলিটী হাস্পতালত সংকটজনক অৱস্থাত আছে। আজি জি এম চি ইছত আঠজন ৰোগীৰ মৃত্যু হৈছে। ইয়াৰে চাৰিজন ৰোগীয়ে শেষ মুহূৰ্তত ঘৰৰ পৰা আহিছিল। অর্থাৎ তেওঁলোক হম আইচ’লেচনত আছিল বা ঘৰতে লুকাই ৰাখিছিল, জ্বৰ হৈ আছিল। অক্সিজেন কমাৰ বাবে হাস্পতাললৈ অহাত একৰ পৰা ডেৰ ঘণ্টাৰ ভিতৰত মৃত্যু হৈছে।

‘‘যিসকলে হোম আইচ’লেচনত আছে বা জ্বৰ হৈ আছে, তেওঁলোকে সময় নষ্ট নকৰি চিকিৎসালয়লৈ আহক। ৰাজ্যৰ পৰিবেশ খুবেই বেয়া। হোম আইচ’লেচনত থকাৰ বাবে মৃত্যুৰ সংখ্যা বৃদ্ধি হৈছে। হোম আইচ’লেচনৰ নিয়ম মনা নাই। যোৱা তিনিটা দিনত ২০ৰ পৰা ৩০জন ৰোগীৰ মৃত্যু হৈছে।’’ – ক’লে হিমন্ত বিশ্ব শৰ্মাই।

অক্সিজেনৰ নাটনিৰ কথাও উল্লেখ কৰে মন্ত্ৰী হিমন্ত বিশ্ব শৰ্মাই। তেওঁ কয় যে অক্সিজেনৰ নাটনি হোৱাৰ সম্ভৱনা থকাৰ বাবে দুটা টেংক বহুৱা হৈছে। এই টেংক দুটাত সাতদিনৰ বাবে অক্সিজেন মজুত থাকিব।

লগতে স্বাস্থ্য মন্ত্ৰীগৰাকীয়ে উল্লেখ কৰে যে সোমবাৰে ২০০ আই চি ইউ টেকনিচিয়ান, এক হাজাৰ নাৰ্ছ নিযুক্তি দিয়া হ’ব। অক্টোবৰ মাহত পৰিস্থিতি জটিল হোৱাৰ সম্ভাৱনা থকাৰ বাবে এই ব্যবস্থা কৰা হৈছে। বৰ্তমান নিযুক্তি পোৱাসকল প্ৰশিক্ষণ থাকিব, এক অক্টোবৰৰ পৰা বিভিন্ন স্থানলৈ যাব।

যোৰহাট, ডিব্ৰুগড়, শিলচৰ, গুৱাহাটী, কামৰূপৰ বিভিন্ন স্থানত আই চি ইউ বহুওৱাৰ কাম চলি আছে। জি এম চি এইচত ৪০খন আই চি ইউ বৃদ্ধি কৰা হ’ব। ১৬০০ চিকিৎসা কৰ্মী কোভিডৰ লগত জড়িত আছে। ইয়াৰে জি এম চি এইচৰ ৫০০ চিকিৎসক কোভিডত আক্ৰান্ত হৈছে। ক’লে মন্ত্ৰীগৰাকীয়ে।

লকডাউন মানুহে নামানে, লকডাউন সমস্যাৰ সমাধান নহয়। হোম আইছ’লেচনত থকাসকল বহুত পলমকৈ ৰিপ’ৰ্ট কৰিছে, সেয়া অতি বিপদৰ কথা। হোম আইছ’লেচন বন্ধ কৰিলে মানুহে আপত্তি কৰে। হোম আইছ’লেচনত নথকা সময়ত মৃত্যু সংখ্যা কম হৈ আছিল। ভেকচিন নহালৈ বৃহৎ প্ৰত্যাহ্বান।