‘আমি কেতিয়াও চকু মুদি নাথাকো, কাকো ৰেহাই নিদিওঁ’ – পি এম কিষাণ নিধিৰ অনিয়মক লৈ পুনৰ সকীয়নি কৃষি মন্ত্ৰীৰ

বিগত কেইটামান দিনত পি এম কিষাণ যোজনাত ব্যাপক কেলেংকাৰী সংঘটিত হোৱাৰ তথ্য সংবাদ মাধ্যমত প্ৰকাশ পোৱাৰ পিছত মুখ খুলিলে কৃষি তথা পশুপালন মন্ত্ৰী অতুল বৰাই৷ জনতা ভৱনত বৃহস্পতিবাৰে এক সংবাদমেল আয়োজন কৰি মন্ত্ৰী বৰাই ক'লে, “আমি কেতিয়াও চকু মুদি নাথাকো ৷ আমি কাকো ৰেহাই নিদিও, ইয়াত ৰাজনীতিৰ কথা নাই৷”

“বিষয়টোক আমি গুৰুত্বসহকাৰে লৈছো৷ কৃষকৰ আয় দুগুণ কৰায়েই প্ৰধানমন্ত্ৰীৰ মূল লক্ষ্য৷ NIC–এ গোটেই তদাৰকী কৰিছিল৷ গাইডলাইন বনাই দিছিল৷ এটা পৰিয়ালৰ পতি-পত্নী আৰু শিশুৰ মূৰব্বীজনে আঁচনি সুবিধা পাব৷ বাকী ভাই-ককাই কেইজন যদি কৃষক হয়, তেওঁলোকেও পাব”, ক'লে কৃষিমন্ত্ৰী বৰাই৷

হিতাধিকাৰীৰ তালিকাত হিন্দু গাঁৱত মুছলমানৰ নাম, মুছলমানৰ গাঁৱত হিন্দুৰ নাম সোমোৱা সন্দৰ্ভত মন্ত্ৰী বৰাই খেলিমেলিবোৰ দূৰ কৰিবলৈ চেষ্টা কৰিম বুলি সংবাদমেলত ঘোষণা কৰে৷ লগতে ক'লে, “দিল্লীয়ে ৫% পৰিয়ালৰ ৰিভেৰিফিকেচন কৰিবলৈ কৈছিল৷ কিন্ত আমি এশ শতাংশই ৰিভেৰিফিকেচন কৰাৰ ব্যৱস্থা কৰিছো৷ অসমেই এখন ৰাজ্য যি এশ শতাংশ ৰিভেৰিফিকেচনৰ ব্যৱস্থা কৰিছে৷”

“যদি প্ৰকৃত কৃষকে পোৱা নাই, যদি অনুপযুক্ত লোকে পাইছে, তেন্তে পি এম কিষাণ যোজনাৰ ধন ঘূৰাই দিব লাগিব৷ পিএম কিষাণ যোজনাৰ সকলো হিতাধিকাৰীৰ তালিকা পুনৰ পৰীক্ষা কৰা হ'ব৷ এশ শতাংশ ৰিভেৰিফিকেচন হ'ব”, – সদৰি কৰে মন্ত্ৰী অতুল বৰাই৷

ৰাজ্যত কৃষকৰ সংখ্যা বাঢ়িছে বুলি উল্লেখ কৰি মন্ত্ৰী বৰাই কয়, “৪৭৫ কোটি টকা লকডাউনৰ সময়ত কৃষকৰ একাউণ্টত সোমাইছে৷ কৃষকৰ উৎপাদন দুগুণলৈ বাঢ়িছে৷ কৃষক এইবাৰ উপকৃত হৈছে৷ মধ্যভোগী নোহোৱা হৈছে৷ কৃষকে উপযুক্ত মূল্যত উৎপাদিত সামগ্ৰী বিক্ৰী কৰিছে৷ ৩২৪ কোটি টকাৰ শাক–পাচলি আমি ৰাজ্যৰ বাহিৰত বিক্ৰী কৰিছো৷”